Mittarfeqarfiit isornartorsiuineq ilumuunnginneraraat: Illuutinik tunisaqartarpugut

Kangerlussuarmi illuutinik atorneqarunnaartoqaraangat tunisisoqartarpoq, Mittarfeqarfiit tusagassiorfinnut nalunaarummi allappoq

Takornariartitsisartup Jens-Pavia Brandtip Sermitsiami allaaserisami Mittarfeqarfiit illuutinik tunisaqarumasanngitsutut isornartorsiorpai, naak illuutit mittarfimmit atorneerussimagaluartut.

Tamannali Mittarfeqarfinnit ilumuunnginnerarneqarpoq.

- Mittarfeqarfiit Namminersorlutik Oqartussat sinnerlugit illuutinik arlalinnik ilaatigut Kangerlussuarmi namminersorlutik inuussutissarsiuteqartunut tunisaqarnikuuvoq, Mittarfeqarfinnit tusagassiorfinnut nalunaarummi oqaatigineqarpoq.

Jens-Pavia Brandt isumaqarpoq, Namminersorlutik Oqartussat Kangerlussuarmi ineriartornissaagaluamik unittoortitseqataasut.

- Naalakkersuisutsinnit ineriartornerup tamatuma kigaallassimaartinneqarnera eqqumiigaara. Mittarfeqarfiit (MIT) Kangerlussuarmi illorpassuarnik pigisaqarput. Illut atorneqanngitsut, kisiannili uninngaannartut aserfallakkiartortullu, igalaavi aserortersimasut qaliaallu putoortut. Tamatuma peqatigisaanik inuussutissarsiortutut namminersortutut illuutinik pisisinnaatitaanngilagut taakkunanilu niuernermik ingerlatsisinnaanata, Sermitsiamut oqarpoq.

AAMMA ATUARUK:

Kangerlussuaq: Nunaqarfik kipiluttunartorsiorfiusoq

Tamannali ilumuunngitsoq Mittarfeqarfinnit oqaatigineqarpoq.

- Illuutinik tunineqarsinnaanngitsunik piserusuttunik Mittarfeqarfiit saaffigineqarnikuuvoq. Illuutip pineqartup aalajangersimasup ilaa nunaqarfimmik kiassaanermut atorneqarpoq., Mittarfeqarfiit allappoq.

- Illuutit atorneqaratik aserfallakkaluttuinnartut tunineqarnissaat Mittarfeqarfiit soqutigaat. Illuutinilli atorneqanngitsunik piserusullutik saaffiginnilussinnartoqarnikuunngilaq. Illuutit atorneqartut tunisinnaanngilagut mittarfimmik ingerlatsinermik suliaqarnitsinni pisariaqartikkatsigit, Mittarfeqarfiit pisortaanerat Marie Fleischer oqarpoq.

Mittarfeqarfiit Namminersorlutik Oqartussat suliffeqarfiutigaat namminersortitaq. Tamanna pissutigalugu illuutinik allanilluunniit tunisaqarniaraanni tamanna tamanut tuniniarneqarnissaa piumasaqaataavoq.

Jens-Pavia Brandtip apersorneqarnera tamakkerlugu Sermitsiami atuarsinnaavat:

Sermitsiaq Uge 36 2018

Una toorlugu atuaruk

Powered by Labrador CMS