Misissuisartut: Timmisartortartut kukkuluttornerat pissutaalluni Ilulissani ajutoortoqarpoq

Air Greenlandip timmisartua Dash-8 Ilulissanut minnermini ajutoormat inuit marluk siullermik annikitsumik ajoqquserput, timmisartoq januaarimi ajutoormat.

Timmisartup sakkortuvallaartumik minnerata kingunerisaanik timmisartoq atorneqarsinnaajunnaarpoq. Timmisartup minnermini mittarfiup sinaanut sisoorpoq.

Timmisartut ajutoorsimanerinik misissuisartut ajutoortoqarnera pillugu nalunaarusiartik naammasseqqammersoq tusarliuppaat.

Timmisartortartut kukkuluttorsimanerat nalunaarutigaat. Ullumi tassani ajutoorfiusumi Ilulissat anorlerpoq, timmisartortartut Ilulissanut minngiinnarsimasinnaagaluarput imaluunniit minnissamut misileeqqissimasinnaagaluarput. Timmisartortartut minniarlutik kisimi aalajangiusimanerat annertuumik kinguneqarpoq.

- Ilulissani ajutoornermut silap sakkortuumik naatsorsoruminaatsumillu anorlernera aammalu qaqqamit sakkortuumik anoraasuasarnera peqqutaasuni pingaarnersaavoq, kisiannili aamma tårnimut radiukkut attaveqarnerup naammannginnerata kingunerisaanik anoraasuasarnerup sakkortussusia kukkusumik nalilerneqarpoq timmisartullu ingerlanini allanngortissimanngilaa, Timmisartut ajutoorsimanerinik misissuisartut misissuereerlutik allapput.

Timmisartumut nalunaartoqaraluarpoq sila anorlertoq, timmisartumili aquttut periarfissaasut ujartulinngilaat. Sinaanit 31 knobimik anorleraangat timmisartut mittassanngitsut Air Greenlandimi malittarisassaqarpoq, timmisartoq Ilulissanut mimmat sinaatigut 39 31 knobinik anorlerpoq.

Ajutoortoqarnerani ima pisoqarpoq: timmisartup assakaasuata saamiatungaata niulua napineranut timmisartup ajutoorneranut pissutaasoq. Timmisartoq sakkortuallaamik minnermini assakaasup niulua napisussatut sanaavoq. Timmisartoq ajornerusumik ajoqqusinnginnissaa anguniarlugu assakaasut niului sakkortuallaamik minnermi aserortussatut sanaapput. Taamatut sanaasimanngitsuuguni assakaasut niului timmisartup orsiisarfianut puttussimassagaluarput.

Ajutoortoqarsimatillugu misissuisartut misissuinerminni paasinarsivoq Air Greenlandip timmisartua timmisartup milernerani qanoq sakkortutigisumik anorlernissaanik killigititaa tikingajallugu ullormi tassani anorlersimasoq.

Aquttut aamma allamik kukkuluttorput. Timmisartup motoorii siusinaarlutik sakkukillivaat. Timmisartoq mimmat allaat timmisartoq 524 meterinik sisoorpoq.

- Timmisartup aqunneqarsinnaajunnaarnerata tamanna pissutigaa, nalunaarummi ilaatigut allanneqarpoq.

Timmisartumi aquttut timmisartup siuani anisarfikkut anisinnaajunnaaput innaarsummut aporeernermi kingorna, ammaniaqqakkullu timmisartumi inuttaasorlu oqaloqatigiittariaqarlutik. Timmisartumi ilaasut aniasinneqarput, tamarmillu annerusumik ajoqquteqarnatik anipput.

Timmisartumi naalagaasup misilittagaqarpallaarsimannginnera ajutoortoqarnerani pissutaasimasinnaavoq. Timmisartut naalagaattut misilittagartuutut taaneqalersarput tiimini 100-ni naalakkatut aquttuusimagaangata, uanilu eqqartorneqartumi naalagaasoq 85 tiimini timmisartuussinermi naalakkatut misilittagaqarluni.

Aamma aquttut Dash 7-imut aquttuusarsimapput, Dash 8-rtallu nutaaliaanerunera pissutaalluni kukkuluttortoqarsimanissaa ilimagineqarpoq.

Timmisartumi aquttut simulatorikkut aamma assingusumik pisumik sungiusartinneqarsimagaluarput siornatigut, taamaattorli misilittagarilersimasatik atorsimanngilaat pisumi.

Ilulissani timmisartunik mittoqalernerani aqutsisoqarfiani aamma silamik nalunaarummik kukkusumik nassiussisoqarsimasoq paasineqarpoq, tassani mittarfiup illuatungaata anoraata qanoq sakkortutiginera paasissutissiissutigineqarluni. Tamannali ajutoortoqarneranut sunniuteqarnersoq ilisimaneqanngilaq.

Timmisartut ajutoorsimanerinik misissuisartut nalunaarusiaat talerpiata tungaani atuarneqarsinnaavoq

Air Greenlandimi pisortaaneq Michael Højgaard aamma timmisartornermut pisortaq Jacob Nitter Sørensen nalunaaquttap 15.00-ip kingorna apersorneqarsinnaanngussapput, Air Greenlandimi attaveqatigiinnermut pisortaa Katrine Hjelholt nalunaarpoq.