Skip to main content

Misissuineq: Innuttaasut toqqissisimapput

Nunatsinni innuttaasut akornanni toqqissisimaneq qaffasissoq, Danmarkimilu pissutsit naligalugit inissisimasoq, misissuinerup nutaap takutippaa. Kisitsisit pitsaammata, politiit iliuuseqarnerat aaqqiivigineqartariaqanngilaq.

Kalaallit Nunaanni Politiit, Rigspolitiet, Danmarks Statistik aamma Naatsorsueqqissaartarfik suleqatigalugit, ‘’Kalaallit Nunaanni Politiit Toqqissisimanermik misissuinerat’’ suliarisimavaat.

Toqqissisimaneq aamma tatiginninneq

Aatsaat siullermeerluni taamatut misissuisoqarpoq, tassanilu sammisat marluk uuttortarneqarput: innuttaasut inuiaqatigiinni toqqissisimanerat aamma innuttaasut politiinut tatiginninnerat. Misissuinermi inernerit marlunnut avinneqarsimapput, inernerit taamaalillutik Nuummi innuttaasunit, illoqarfinni politeeqarfilinni aamma najugaqarfiit politeeqarfeqanngitsut immikkut takuneqarsinnaaniassammata.

- Toqqissisimaneq Kalaallit Nunaanni qaffasissoq, misissuinerup takutippaa, tamannalu nunap suatungaaniluunniit najugaqaraluaraanni inernerineqarpoq. Kalaallit Nunaanni Politiinut tatiginninneq aamma qaffasippoq – Danmarkimiillu aamma qaffasinnerulaarluni – tamannalu nuna tamakkerlugu aamma taamaappoq, politiit tusagassiuutinut nalunaarutaanni tamanna atuarneqarsinnaavoq.

Politiit nalunaarusiaat uani atuaruk (qallunaatoorpoq) 

Sakkussaq pitsaasoq

‘’Innuttaasut akornanni toqqissisimalersitsisumik pinerluttuliornermik akiuiniarnermi aamma suliniuteqarniarnermi misissuineq politiit sulinerannut sakkussaq pitsaasuusoq’’, politimesteri Bjørn Tegner Bay oqarpoq.

- Sulinermi qanoq tulleriiaarinissatsinnut tikkuussivoq, Bjørn Tegner Bay, tusagassiuutinut nalunaarut naapertorlugu taama oqarpoq.

Politimesterip misissuineq Sermitsiaq.AG-mut ima itisilerpaa:

- Innuttaasut akissuteqaataat misigisartakkatsinnut naapertuuttut uppernarsarparput. Assersuutigalugu inunnut uloriaanaatilimmik pinerlunnermut aamma angerlarsimaffinnut tillinniartarnernut iliuuseqarnermut tunngassuteqarpoq, Bjørn Tegner Bay nassuiaavoq.

Eqqarsaatissiisoq

Misissuinermi peqataasut misissuinermut atatillugu oqaasertaliinissaminnut periarfissaqarsimapput, tassanilu politimesteri eqqarsaatissinneqarsimavoq.

- Nammineq allaffissami arlaqartut politiit biiliinik aqqusinermi takussaanerusoqarnissaanik kissaateqarput. Tamanna paasissallugu uagutsinnut pitsaavoq, Bjørn Tegner Bay oqarpoq, kisitsisinik tunuliaqutaasuni annertuumik allanngortoqassagaluarpat iliuuseqarnermi aaqqiissuteqarfigisinnaasani taassuma ilisimatuussutsikkut misissuinermik peqalernini nuannaarutigaa.

Inernerit ataatsimut isigalugit

Danmarkimi 85,7 procentit toqqissisimallutik akipput, Kalaallit Nunaanni tamanna 83 procentimiippoq. 

Kalaallit Nunaanni innuttaasut politiinut tatiginninnerat Danmarkimit annertuneruvoq. Kalaallit Nunaanni 82,7 procentit politiinut tatiginnittut, Danmarkimi tatiginninneq 79,2 procentimiippoq.

- Najugaqarfinni politeeqarfeqanngitsuni tatiginninneq nunap sinneranit appasinnerulaarsinnaasoq, Kalaallit Nunaanni Politiit maluginiarpaa. Tamatumali inerniliunnissaa kisitsisitigut qulakkeerneqarsimanngilaq, taamaattumillu misissuinerni tullerni tamanna maluginiarneqassaaq, politimesteri oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER