Misissuineq: Nannut kinguaassiutaannut kemikaliat ajoqqusiisinnaapput

Nanuulluni nuannerpallaarnavianngilaq.

Silap pissusaata allanngoriartornera nannunut annertuumik eqquivoq. Aamma kemikaliaqangaatsiartunik piniagaqartartuupput.

Kemikaliat pissutaallutik nuliunerminni annertuumik kinguneqarsinnaasoq Videnskab.dk allappoq.

Aarhus Universitetimi, Hvidovre Hospitalimi aamma Naturhistorisk Museumimi sulisut kemikalia PCB annertuumik misissorpaat. Tassani nannut saarnginut qanoq sunniuteqartarnersut aamma paasiniarneqarluni.

Nannut nuliusarnerat pillugu paasiniaanermi ilisimatuut paasisaqarput.

- Nannut nuliuneranni angutivissat kinguaassiutaat napisinnaasarput. Kinguaassiutip napinera nannunut annernarpallaarneq ajorpoq, kinguaassiutilli equnganera pissutaalluni nuliuniarneq ajornakusoorsinnaasarpoq, Institut for Biosciencemi Aarhus Universitetimi professori Christian Sonne oqaluttuarpoq.

Allanik aamma pisoqartarpoq.

- Tunumi nannut annertuumik eqqugaaqqapput. Nannut angutivissat kinguaassiutaat Canadami nannunut assingupput, saarngit napinerannik kinguneqartarlutik, Christian Sonne oqarpoq.

Misissuineq Environmental Researchimi saqqummersinneqarpoq.

Issittumi kemikaliaqarnera nannunut annertuumik ajornartorsiutaavoq. Qalasersuaq nunarsuatsinni mingutsinneqarnersaat ilagaat naak suliffeqarfissuarnut ungasittuugaluartoq.

Immap sarfarneri anorilu apeqqutaallutik kemikaliat Issittumut apuuttarput.

Nannut Issittumiittuinnaanngillat. Inuimmi nannusut puisitortarput aamma sumiiffiit ilaanni nanortortoqartarpoq.

Taamaattumik inuit nannutulli kemikalianik sunnerneqartigaat, Christian Sonne oqarpoq.

- Kalaallit Nunaanni puulukit savallu kisimik nerineqarneq ajorput. Puisitortoqartarlunilu, arfertortoqartarlunilu ilaatigullu aamma nanortortoqartarpoq. Taakku kemikalianik annertuumik sunnersimaneqarput. Taamaattumik nannut kemikalianik sunnerneqaataat inunnut assigiipput. Taamaattumik inoqqaariit inunni sukkortoqartarnera kræftertoqartarneralu amerliartuinnarneranut kemikaliat pissutaagunarput, Christian Sonne oqarpoq.

Videnskab.dk-mi aamma atuarneqarsinnaapput:

Giftstoffer truer isbjørnenes helbred

Biologer og fangere uenige om antallet af isbjørne