appat

Misissuineq: Appat eqqissisimatilluinnarneqarnissaat innuttaasut kissaatigaat

Tamanna isumasiuinerup nutaap, HS Analysep WWF Verdensnaturfonden sinnerlugu ingerlassimasaata, takutippaa

Innuttaasut amerlanerussuteqartut appat eqqissisimatilluinnarnissaat kissaatigaat

Nunatsinni innuttaasut 60 procentiisa appat eqqissisimatilluinnarneqarallarnissaat isumaqatigaat.

Pingaartumik inuusunnerit 30-t inorlugit ukiullit isumaqarput timmiaq ulorianartorsiortinneqartoq eqqissisimatinneqassasoq. Isumasiuinerup nutaap, WWF Verdensnaturfonden sinnerlugu HS Analysep ingerlassimasaata, takutippaa taamatut ukiullit 67 procentiisa appat eqqissisimatinneqarnissaat isumaqatigigaat.

Inuusunnerit ernumapput

Biologi Nuummilu WWF-imi suliniummut ataqatigiissaarisoq Kaare Winther Hansen oqarpoq ersarilluinnartoq appat attatiinnarnissaat innuttaasut politikerininngarnit pingaartinnerugaat.

– Tamanna peqatigalugu misissuinerup takutippaa kinguaariit inuusunnerit appat nungutaanissaat ernumanartoqartikkaat - tamakkumi aamma eqqorneqarnersaassammata appat nungutaagaluarpata, taanna tusagassiorfinnut nalunaarutikkut erseqqissaavoq.

Kaare Winther Hansenip neriuutigaa Naalakkersuisut pitsaanerusumik isummerumaartut akisussaaffigalugulu Kalaallit Nunaanni inuusuttut siunissami suli appatortagaqarnissaat.

Allaat aalisartut eqqissisimatitseqqusipput

Isumasiuinermi akissuteqartut inuussutissarsiutaat qiviaraanni takuneqarsinnaavoq ilinniagaqartut 81 procentiisa appat eqqissisimatilluinnarnissaat kissaatigigaat, 19 procentiinnaallu akerliusut.

Allaammi aalisartut piniartullu amerlanerit eqqissisimatitsilluinnarnissaq isumaqatigaat. Taamatut inuussutissarsiortut 52 procentiisa eqqissisimatitsinissaq isumaqatigaat, 48 procentiisalu akerleralugu.

– Aaliusartut piniartullu isumaat KNAPK-p isumaanut akerliulluinnarpoq, tassa timmissanut nalunaarutip tusarniaavigineqarnerani aalisartut piniartullu kattuffiata appanik piniarnerunissaq suaartaatigiinnarmagu, appallu ikiliartornerat akueriumanagu. Nuannerpoq takullugu aalisartut piniartullu amerlanerussuteqartut kattuffimminnit silatusaarnerusut, Kaare Winther Hansen oqarpoq.

Ukiakkut sivikinnerpaammik qaammatit marluk piniagaasassapput

Timmissanut nalunaarut nutaaq Naalakkersuisut suli tamanut saqqummiutinngilaat.

Paragraf 37-ili naapertorlugu apeqqummut akissummi takuneqarsinnaavoq upernaakkut sumiiffiit appanniartarfiit annertusineqarnissaat, ukiakkullu sivikinnerpaamik qaammatini marlunni piniarneqartarnissaat Naalakkersuisut aalajangiusimagaat, Pinngortitaleriffiup inassutigigaluaraa ukiuni qulini eqqissisimtilluinnarneqassasut.

Isumasiuineq telefonikkut apersuinikkut ingerlanneqarpoq, inuillu Kalaallit Nunaannit tamarmeersut 722-t apersorneqarsimapput.

Isumasiuinerup inernera tamaat allaaserisap talerpia'tungaani filimi takusinnaavat

Powered by Labrador CMS