Telemi namminersortunngorsaaneq
Misissueqqissaarneq nutaaq suliarineqassasoq
Inuiaqatigiinnut nassataasussat pillugit nutaamik misissueqqissaarisoqaareerpat aatsaat Telemi namminersortunngorsaasoqarnissaa pillugu politikerit aalajangernissaat Søren Lennert Mortensenip nuannaarutigaa
- - Uagut, Nalunaarasuartaateqarnermi Aqutsisoqarfik imaluunniit attaveqaatilerisut unammillertut, namminersortunngorsaaneq pillugu aalajangiisussaanngillat. Tamanna politikerit kisimik akisussaaffigaat, Tele-Postip pisortaanera Søren Lennert Mortensen politikerit aalajangertinnatik inuiaqatigiinnut nassataasussanik misissueqqissaarititseqqaarniarnerannut oqaaseqaammi oqarpoq.
- Taamaammat misigissutsit ilimagisallu pinnagit, misissueqqissaarnerup aalajangiinissamut tunngavileeqataasuunissaa pingaaruteqarpoq. Uanga isumanni pimoorussilluarneruvoq, Søren Lennert Mortensen oqaaseqaammi oqarpoq.
InuIT-ip namminersortunngorsaanermut qanoq isumaqarnera uani atuaruk (qallunaatut).
Attaveqaatilerinermi namminersortunngorsaaneq qanoq inuiaqatigiinnut sunniuteqassanersoq maannakkumut nalunarallarpoq. Taamaammat TELE-POST-ip misissueqqissaarneq inuiaqatigiit aningaasaqarniarnerannut tunngasoq naammassilersoq qilanaaraa.
Ilaatigut attaveqarnermut Naalakkersuisoq, Knud Kristiansen, attaveqarnermut namminersortunngorsaaneq pillugu paragraf 37-mut apeqqutit 18-it akisimavai. Akissutimini attaveqaatilerinermi namminersortunngorsaaneq inuiaqatigiit aningaasaqarniarnerannut qanoq kinguneqarnissaata misissueqqissaarfigineqarnissaa pingaaruteqartoq eqqaavaa. Isumalu tamanna Søren Lennert Mortensenip oqaaseqaatimini tapersersorpaa.
Søren Lennert Mortensenip pingaartumik politikerit, misissueqqissaarnerup inuiaqatigiit aningaasaqarneranut qanoq kinguneqarnissaanut takutitsilluarninngorpat, namminersortunngorsaanerup ingerlatiinnarnissaanut aalajangiinissaat iluaraa.
Taassuma erseqqissaatigaa, politikerit aalajangiinerat qanorluunniit ikkaluarpat, nammineq Tele-Postillu tapersersussagaat.
Kujataani, kangiani avannaanilu nammaqatigiinneq
Nammaqatigiinnermik periaatsip pissusiviusuni qanoq atuukkumaarnerata paasinissaa Tele-Postimut pingaartueqartoq, Søren Lennert Mortensenip oqaaseqaataani atuarneqarsinnaavoq.
IA isumaqarpoq namminersortunngorsaanerup nunarput avissaartuutsissagaa, maani annerusumik atuarit.
- Sumiiffinni assigiinngitsorpassuarni sullitaqarpugut, attaveqaatilerinermi sullissisut nutaat aningaasaqarnerup tungaatigut ornigiunnanngisaannik. Innuttaasut kujataani savaatillit avannaani kangianilu satellitsimik attaveqartut pineqarput. Attaveqaatilerinermi namminersortunngorsaanermi periarfissaat ajornerulersinneqassanngillat. Innuttaasut tamarmik attaveqarnermut nutaaliaasumut atuisinnaatitaassapput, Søren Lennert Mortensen nassuiaavoq.
Imaatigut kabelimik tallililineq
Attaveqaatilerinermi namminersortunngorsaasoqalinngikkaluarpalluunniit, TELE-POST-ip imaatigut kabelimik avannaanullu sakkortusaavimmik talliliinerit ingerlatiinnassavaat. Sumiiffinni pineqartuni attaveqarnikkut pisinnaasatigut annertuumik sunniuteqassaaq, Nuummiimmi Aasiaat tungaanut imaatigut kabelimik talliliisoqassaaq, Uummannamiit Upernavimmut sakkortusaavimmik talliliisoqarluni, Aasianniillu Ilulissanut sakkortusaavik allilerneqassalluni. Suliaq 300 mio. koruunit missaannik akeqassaaq, aningaasaliinerlu naammassilluassappat 2016-ip ingerlanerani naammassineqarnissaa naatsorsuutigineqarpoq.
Namminersortunngorsaaneq pillugu oqallinneq maani annerusumik atuaruk.