MIOp sms-ikkut siunersuisarnera aallartilluarpoq

MIOp sms-ikkut siunnersuisarfia oktobarip aallaqqaataani 2013-mi aallartippoq. Tamatuma kingorna sms-ikkut siunnersuisarfik '1899' qaammammut meeqqanit 200-t angullugit siunnersortinniartunit saaffigineqartarpoq. Ingammik meeqqat 10-iniit 17-inut ukiullit ikiortissarsiortarput.

Meeqqat Illersuisuata Aaja Chemnitz Larsenip nuannarutigaa, meeqqat quliinnarnik ukiullit 1899-imik atuisuunerat, meeqqat tassaammata ikiortissarsiorlutik kommunimut qaqutigut saaffiginnittartut.

Tamanit saaffigineqartarput
- Pitsaasoq tassaavoq saaffiginnissutit Kalaallit Nunaannit tamaneersuummata aammalu amerlavallaanngitsut Nuummeermata. Immaqa illoqarfinni anginerni saaffissaqarnerunera tamatumunnga pissutaavoq, Meeqqat Illersuisuat oqarpoq nangillunilu.

- Saaffiginnittut amerlassusaasa takutippaat, siunnersorneqarnissamik pisariaqartitsisoqarsimasoq, tamannalu siusinnerusukkut periarfissaasimanngilaq nuannaarutigaaralu, MIO-p sms-ikkullu siunnersuisartutta pikkorissut meeqqat inuusuttullu siunnersorneqarnissaminnik pisariaqartitsisut ikiorsinnaammatigit.

Saaffiginnissutigineqartartut
Saaffiginnissutit amerlanerpaartaat qinngasaartittarnermut, angerlarsimaffimmi ajornartorsiutinut tunngassuteqartarput, taakkununnga ilanngullugit persuttaasarneq, atornerluineq, imminorneq kinguaassiutitigut kanngutsaattuliorfigitinneq. Ajornartorsiutit annertoorujussuit meeqqat inuusuttullu 1899-imut saaffiginnissutigisarpaat.

- Ilisimasat tamakkua aqqutigalugit meeqqat inuusuttullu unammilligassaat pillugit soorlu assersuutigalugu politikerinik angusaqarnerujumalluta siunnersuisinnaavugut, iliuuserineqartut qanoq isillugit annertusarsinnaanerlutigit. Amerlanerujartuinnartut kinguaassiutitigut kanngutsaattuliorfigitissimaneq pillugu saaffiginnittarput kiisalu meeqqat inuusuttullu amerlanerujartuinnartut angajoqqaaminnik ajornartorsiuteqarnertik pillugu saaffiginnittarput

.- Tamatumani uppernarsarparput, kinguaassiutitigut kanngutsaatsuliorfigitinnerit pinaveersaartinnissaat saaffiginniffissallu suli annertunerusumik sulissutigisariaqarigut, taamaasillutik angajoqqaat meeqqaminnut akisussaasuunertik naammassisinnaaneruniassammassuk, Aaja Chemnitz Larsen oqarpoq.

Meeqqat inuusuttullu kinaassusertik isertorlugu akeqanngitsumillu sms-ikkut 1899-imut allassinnaapput, tassanilu siunnersorneqarlutik.

Suleqataasut arfineq-marluk
MIO arfineq-marlunnik siunnersorteqarpoq, taakkualu ilinniarsimasutut tunuliaqutaqarput meeqqanik siunnersuisinnaallutik paarlakaajaallutillu meeqqanik siunnersuisarlutik. MIOp sms-ikkut meeqqanik inuusuttunillu siunnersuisarfiat ulluinnarni nalunaaqutaq 16.00-mit 18.00-imut ammasarpoq, kisianni siunissaq eqqarsaatigalugu sivisunerusumik ammasarnissaq siunertaralugu aningaasaqarnikkut aaqqiissutissamik nassaarnissamik neriuuteqarpoq.