Prisværdigt
MIO-p meeqqanik sullissinermik nersornaataa Inooqat-mut tunniunneqarpoq
Peqatigiiffik qaammatinik sisamaannarnik pisoqaassusilik Inooqat: meeqqat inuusuttullu ineriartornermikkut akornutillit angajoqqaavisa peqatigiiffiat MIO-p meeqqanik sullissinermik nersornaataanik tunineqarpoq
– MIO-p nersornaataanik nersornaaserneqarnissinni qamannga pisumik pilluaritsi. Pisassarilluarparsi piffissami sivikitsuinnarmi takutissimagassiuk atorfissaqartinneqartorujussuullusi piffissamilu sivikitsumi atuunnissinni angusaqartorujussuusimalluni. Sinerissami angajoqqaanit sianerfigineqartarpunga tassuumalu tusarlugu qanoq sulilluartigisusi. Tamatumunnga qujanaq, neriuppungalu suleqatigiilluarnerput tamanna ukiumi nutaami nanginneqaqqissasoq.
Taamatut oqarpoq ilaqutariinnut inatsisinillu atortitsinermut Naalakkersuisoq Martha Lund Olsen, tallimanngormat MIO-p nersornaasiuttagaanik siullermeersumik tunniussisoqarnerani peqataasoq.
Aamma atuaruk: MIO-p nersornaataa siulleq kiap pissavaa
Nersornaat, 20.000 koruuninik aningaasartalik, tallimanngormat ualikkut Katuami tunniunneqarpoq, taannalu kalaallit meeqqat inuusuttullu ineriartornermikkut akornutillit angajoqaaavisa peqatigiiffiannut qaammatinik sisamaannarnik pisoqaassusilimmut tunniunneqarpoq. Peqatigiiffik ukioq manna septembarimi pilersinneqarpoq piffissamilu sivikitsumi tamatumani aalajangiisartunut sunniuteqarluareersimalluni.
Peqatigiiffik ilaatigut Facebook-ikkut attaveqarfigineqarsinnaavoq, tassa gruppimik ammasumik pilersitsisimagami.