MIO-p akissarsiaritittagaa meeqqanut immikkoortortamut tunniunneqarpoq
Ukiut tamaasa 20. novembarimi Meeqqat Pisinnaatitaaffii pillugit Sullissiviup MIO-p Naalagaaffiit Peqatigiit Meeqqat pillugit Isumaqatigiissutaata ulloritinneqarnera malunnartittarpaa. Ulloq nalliuttorsiutigineqartarpoq meeqqanut immikkut suliniuteqarsimasumut ukiumoortumik MIO-p akissarsiaritittagaanik ilaatigut tunniussinikkut.
Ukioq manna MIO-p akissarsiaritittagaa Dronning Ingridip Napparsimmavissuani meeqqanut immikkoortortamut tunniunneqassaaq. Akissarsisitsinermut tunngavilersuutigineqarpoq meeqqap inuunissamut, ineriartornissamut, illersorneqarnissamut aamma ikiorneqarnissamut pisinnaatitaaffiinik meeqqanut immikkoortortap suliaqarneranik.
Meeqqat Illersuisuata Aviâja Egede Lyngep MIO-p akissarsiaritittagaa Sanami Meeqqanut Immikkoortortami aqutsisumut Uka Wilhjelm Geislerimut tunniuppaa. Meeqqat Illersuisuata MIO-p akissarsisitsineranut tunngavilersuut itisilerpaa:
Inuunermi pitsaanerpaamik aallartitsinissaat
- MIO-p akissarsiaritittagaa meeqqat pisinnaatitaaffii pillugit sulinermut pitsaasumut nersortariaqartumullu nersorinninneruvoq. Sulinermi atugassarititaasut artornartaraluartut, meeqqanut immikkoortortap pimoorussineq nutaamillu eqqarsarsinnaaneq takutippai. Pingaartumik meeqqanut immikkoortortap meeqqat tamavimmik inuunermi pitsaanerpaamik aallartitsinissaannik ukkatarinninnermini. Ulluinnarni atorfissi meeqqap inuunermut pisinnaatitaaffianik, ineriartornissamut, illersorneqarnissamut aamma ikiorneqarnissamut pisinnaatitaaffiinik suliaqarneruvoq. Sulinersi kikkunnut tamanut siunissami pitsaanerusumik atugaqalernissamut neriuuteqalersitsivoq.
Akissarsiamik tunniussineq Sanami Meeqqanut Immikkoortortami pivoq, Sanami sulisut, aqutsisut kiisalu Isumaginninnermut Naalakkersuisup, Martha Abelsenip peqataaffigisaanik.
MIO-p akissarsiarititai 20.000 koruuniusut NunaFondenimik aningaasalerneqarput.