Børn og unge
MIO: Nunatsinni meeqqanut tunngasut ajortumik inissisimapput
Meeqqat illersuisuat Naalagaaffiit Peqatigiit Meeqqanut tunngasunut Ataatsimiititaliaannut nalunaarusiamut ilaasussamik nassiussaqarpoq, taanna Naalagaaffeqatigiit pisortatigoortumik nalunaarusiaanni ilaassaaq. Meeqqat pisinnaatitaaffii Nunatsinni atuutsinneqaqqajanngillat, ilaatigut nikallornartumik taama allappoq
Naalagaaffeqatigiit meeqqat pisinnaatitaaffii pillugit Danmarkip Naalagaaffiit Peqatigiinnut nalunaarusiassaanut Naalakkersuisut Nunarput pillugu kusassakkamik nassiussisimapput.
Meeqqat pisinnaatitaaffii pillugit sullissivimmit MIO-mit taama oqartoqarpoq, taakkua Naalagaaffinnut Peqatigiinnut nalunaarusiamut ilaasussatut taaneqartartumik suliaqarsimapput, taannalu pineqartoq pillugu pisortatigoortumik nalunaarusiamit nikallornarneruvoq.
Atuaruk: MIO-mut aningaasaliissutit amerlanerusut
Pissutsinut piviusunut naapertuutinngitsoq
Tassami kalaallit meerartaat annertuumik naapertuilluanngitsuliorfigineqartarput, atornerluiffiusuni peroriartortarlutik aamma angerlarsimaffimminnit peersitaagajuttarlutik, MIO Naalagaaffinni Peqatigiinni oqartussanut allappoq, nalunaarusiaq taanna naammassillugu suliarineqareerpat Kalaallit Nunaat Naalagaaffeqatigiit sinneri peqatigalugit sassartinneqartussaasoq.
- MIO-p pingaarnertut isumaa tassaavoq, Danmarkip tallimassaannik nalunaarusiaa Nunatsinni meeqqat inuusuttullu unammilligassatut misigisartagaannut pissutsinut piviusunut naapertuutinngitsoq, ajornartorsiutillu soorlu sumiginnaaneq, nakuserfigineqartarneq, iluaquteqapilunneq kinguaassiuutitigullu atornerluinermut tunngasut amigaataallutik, nalunaarusiami allassimavoq.
Atuaruk: MIO nuna tamakkerlugu meeqqanut pilersaarusiortoqarnissaanik piumasaqarpoq
Unammilligassat annertuut
Ataatsimut isigalugu Kalaallit Nunaat Naalagaaffiit Peqatigiit meeqqat pisinnaatitaaffii pillugit isumaqatigiissutaannut, ukiut 20-t matuma siornagut atsiorneqartumut, aaqqiagiinngissuteqartoq, MIO isumaqarpoq. Tassani tupigusuutigineqarluni pisortatigoortumik nalunaarusiami piviusut allaaserineqannginnerat, taamaallaalli piumasarineqartut isumagineqartarlutik, soorlu inatsisit suliniutillu suut atuutilersinneqarsimanersut taaneqarmata.
- Naalakkersuisut Naalagaaffiit Peqatigiit meeqqat pillugit isumaqatigiissutaasa malitsinniarnissaannut ilungersunartunik suliassaqartut MIO-p maluginiarpaa, ingammik meeqqat illersorneqarnissaat, aamma meeqqat inuusuttullu pitsaasumik ilinniagaqarnissaasa qulakkeerneqarnissaannut tunngatillugu, taamaalillutimmi akisussaassusilimmik peqqinnartumillu inuuneqarnissaat qulakkeerneqarniassammat, MIO inerniliilluni taama allappoq.
Atuaruk: Meeqqat illersuisuat aarlerisaarivoq: Meeqqat qulinik ukiullit ikiaaroortarput
Allaaserisaq tamaat AG-mi atuaruk, taanna ullumi pisiniarfinni pisiassaalerpoq. Aviisi uani pisiarinissaanut aamma periarfissaqarpoq: