isumassuineq
MIO: Maanna oqaatsit kusanartut iliuusinngortinneqassapput
Meeqqanik sumiginnaanermik ajornartorsiutit isiginiarneqalersimasut, meeqqat illersuisuat Aviâja Egede Lynge isumaqarpoq. Kisianni aaqqiivigineqarnissaannik ujartuivoq.
2015-imili juunip aallaqqaataani meeqqat ulluanni meeqqat nutaamik illersuisoqalerput: Aviâja Egede Lyngemik ateqarpoq, atorfiup taaguutaa, Meeqqat Illersuisuat.
Inersimasut meeqqanik sumiginnaagaangata, atornerluigaangata imaluunniit allatigut nuannaanngitsitsippata, tassuma nipaa taamanili ersarissumik tusaaneqarsinnaavoq. Ingammillu kommunit oqartussallu allat meeqqanik sumiginnagaareersunik sumiginnaatillugit nipi ersarittarpoq.
Nassuerutiginnittoqarpoq
Aviâja Egede Lyngep ukiut marluk kingulliit qiviaraangamigit, ineriartortoqarsimasoq nammineq misigisimasarpoq.
- Ajornartorsiutit qangali piusut ilisimariikkagut nassuerigutigineqarnikuupput, taanna Sermitsiaq.AG-mut oqarpoq.
Aviâja Egede Lyngep atorfik meeqqat illersuisoqqaavanit Aaja Chemnitz Larsenimit kingoraarpaa, taanna MIO-p sulineranut tunngaviliisimavoq.
Sapaatip-akunneratalu siuliani MIO-p 2016-imut ukiumut nalunaarutaa saqqummerpoq, tamakkerluni Aviâja Egede Lyngep atorfeqarnerata nalaaneersuulluni.
- Politikkikkut meeqqanik sumiginnaanermik ajornartorsiuteqarneq aamma pinngitsaaliisarneq politikkikkut pingaartinneqarnerulertoq, uanga nalilerpara.
Kommunini nikinneq
Taassuma angalanerminit nalunaarusiaanut isornartorsiortunut kommunit qisuariaataannik allanngortoqarneranik takusaqarsinnaavortaaq.
- Kommunini allannguisoqarnera ersarissumik malugisinnaavara. Qaasuitsup Kommunianut angalanerma siulliup kingorna suaartoqarpoq, tamanna meeqqat atugaannik qaammarsaaneq nutaajuvoq. Qeqqata Kommunianut angalanermi kingullermi killormoorpoq - tassani politikerinit tikilluaqquneqarpugut, angusatsinnullu soqutiginnipput, taamaalillutik tassanngaanniik qisuariarnissamik periarfissaqarniassagamik.
Kisianni meeqqat illersuisuata inatsit nutaaq aamma iliuusissatut pilersaarutit allaasut oqaatigaa - meeqqallu ikiorneqarnerat illersorneqarnerallu allaasoq.
- Maanna kommunit aamma Namminersorlutik Oqartussat nassuerutiginninnermit iliuuseqarnermiinneranniippugut. Tassami pingaarnerpaasumut tunngatillugu, tassa meeqqap ikiorneqarneranut, suli annertuumik kinguaattooqqasoqarpoq.
Taamaammat maannamut Aviâja Egede Lyngep meeqqat namminneq avatangiisiminnik oqaluttuarnerannut tusarnaarluni suliaqarnini nanginniarpaa. Tamatuminngami ilisimasaqarneq aalajangiisuussammat.
- Ungasissumut pilersaaruteqarnissarput pingaaruteqarpoq, taamaalilluni ukiut qulit qaangiuppata meeqqamik illersuisup nutaap, meeqqanik sumiginnaanerujussuit uparuartussanngimmagit. Ungasissumut pilersaarutinut tunngatillugu isumalluarpunga, kisianni maanna piviusoq tamatuma allanngortinngilaa: meeqqat amerlavallaat maannakkorpiaq pisarialimmik ikiorneqanngillat.
Aviâja Egede Lynge aappaagu juunip tungaanut meeqqanut illersuisuussaaq. Naalakkersuisut taassuma atuuffia ukiuni pingasuni sivitsorniarlugu aalajangersinnaavaat.