MIO ersarissumik oqariartuutitalimmik plakatiliortitsivoq

- Illerpiaasinnaavutit.

Taama oqariartuuteqartumik MIO plakatinik saqqummersitsivoq. Plakati ammip qalipaataa, suiaassuseq, seksualiteti, oqaatsit, isikkoq, politikkikkut isummat, innarluuteqarneq imaluunniit suminngaanneerneq apeqqutaatinnagit inunnik tamanik ataqqinninnissamut kajumissaarutaavoq.

- Kinaanerit, qanoq misiginitit qanorlu isikkoqarnerit apeqqutaatinnagit naleqarputit. Kalaallilli Nunaanni piviusoq imaappoq, inoqatit allaanerugaangata imaluunniit pissutsit allat tunngavigalugit inoqatinut pimmatiginninneq nakkarsaanerlu atugaasorujussuummata. Tamatuma kingunerisarpaa, meeqqat inuusuttullu ilaasa naleqannginnermik misigilersarnerat. MIO-p takutippai naleqartut, kinaagaluarpata, qanoq misigigaluarpata suminngaanneersuugaluarpatalu apeqqutaatinnagit, Meeqqat posommaatitaaffiinik sullissivik tusagassiutinut nalunaarummi allappoq.

Angajoqqaanut oqariartuut

Inersimasut kajumissaassallugit, inuit tamarmik naleqarnerannik meeqqanut ilinniartitsinissamik akisussaaffimmik tigusinissaannut siunnersuutaavoq.

Naalagaaffiit Peqatigiit Meeqqat Piginnaatitaaffii pillugit Isumaqatigiissutaanni artikeli 2-mi allassimavoq, meeqqat tamarmik naligiimmik pisinnaatitaaffeqartut, meeqqap, angajoqqaat imaluunniit taakkua sinnerlugit perorsaasuata inuiaassutsikkut, ammip qalipaataatigut, suiaassutsikkut, upperisakkut, politikkikkut imaluunniit allatigut isiginnittaatsikkut, inuttut atugarisatigut imaluunniit innarluuteqarnikkut qanoq ittuuneq apeqqutaatinnagu.

- Uagut inersimasut taakkuuvugut meeqqatta pisinnaatitaaffiinik eqquutsitsinissamut kiisalu maligassiuinissamut akisussaasuusut. Inersimasut amerlasuut puigortarpaat pissusilersuutsimikkut ilisimanngisamik imaluunniit ilisimasamik allanik uparuartuineq ajunngitsuusoq meeqqat ilinniartittarnerat, massa kikkut tamarmik naligiimmik pisinnaatitaaffeqartut. Taamaattumik inersimasunut tamanut kajumissaarutigaara, kikkut tamarmik – kinaanertik apeqqutaatinnagu akuerineqartutut misiginissaannut akisussaaffimmik tiguseqqullugit, meeqqat illersuisuat Aviâja Egede Lynge tusagassiutinut nalunaarummi allappoq.

Angerlarsimaffinni nivinngarli

Meeqqat Illersuisuata plakati angerlarsimaffimmi, suliffimmi, atuarfinni sumiiffinnilu allani nivinngarneqassasoq inersimasunut kajumissaarutigaa.

- Plakati imminermini aaqqiissutaanngilaq, tamatumali eqqaasissinnaavaatigut namminiussuserput naligiimmik pisinnaatitaaffigigatsigu kiislau pissusilersuutit suut akuersaarneqarsinnaanersut suullu akuersaarneqarsinnaannginnersut oqallisiginissaannut atorneqarsinnaavoq. Plakati atuarfinnut, suliffeqarfinnut soqutigisalinnullu nassiussuunneqassaaq, kiisalu MIO-mut saaffiginninnikkut akeqanngitsumik pissarsiarineqarsinnaalluni, MIO allappoq.