Minkiuteqarfiit: Akerliusut atsiornernik katersipput
Kujataani minkiteqarfinnik pilersitsinissamik pilersaaruteqarnerup akerliusut nittartakkakkut atsiornernik katersillutik iliuuseqartippaat.
Inunnguaq Christiansen atsiornernik katersinermut iliuuseqartuuvoq. Minkiuteqarfiit kalaallit puisit amiinik avammut niuerutigineqarneranut kinguneqartitsisinnaasut, taanna isumaqarpoq.
Atsiornernik katersinermut atatillugu taanna ima allappoq:
Naakkittaatsoq
‘’Inuuneq tamaat uumasut inaanniititsineq inuit amerlanerpaartaasa naakkittaatsuunera isumaqataaffigissagunarpaa, kalaallillu naleqartitaannik, tassa uumasunik nujuartanik pinngortitami uumasimasunik kisimi pisaqartarnitta killormoortuanik iliuuseqarnertut isigineqarluni.
Kalaallit puisip amianik avammut tunisisarnera maanna ilungersunareerpoq, Kalaallit Nunaannilu minkit amii pillugit minkiuteqalernissami tusagassiorfitsigut nuna suli ajornerusumik isigineqalissaaq. Atisaliortartut uumasuusivinnit amernik atuiunnaariartulernikuupput.
Minkiuteqarfittaarneq aamma akisussaassuseqannginneruvoq, tassami qimaasuussagaluarunik sumiiffimmi pinngortitap ataqatigiinneranik ajoqusiisinnaapput.
Kujataani minkiuteqarfeqarnissamut naaggaarpugut! Uumasut inaanni inuuneqartitsinissamut naaggaarpugut! Kalaallit Nunaata tusaamanerlunneqarnerulernissaanut naaggaarpugut!’’
Atsiortut 259-t
Apriilip qulinganiilli atsiortitsinerup aallartinneqarneranit 259-inik atsiortoqarsimavoq.
Atsiornernik katersuiniarneq uani takusinnaavat