Ministeriusimasoq sallulluni kalaallit nukappiarartaat issuertittarsimanerarai

Inuussutissanut Ministeriusimasoq Mette Gjerskovi (S), salluliorluni kalaallit nukappiarartaat marluk issuertittarsimanerarpai.
Kingornalu taassuma taanna Twitter-imini ingerlateqqissimavaa.

Mette Gjerskovip tusagassiuuteqarfiit annertuallaamik kanngunarsinnaasumilli eqqartuussivimmi sulianik allaaserinnittarnerat ukkatigineqarnissaa kissaatigisimavaa.

Taanna suliamik ataatsimik oqallititseriarsimangaluarpoq, suliaq pineqartoq tassaavoq somaliamiut angajoqqaat panitik marluk manissaqarfiannik peertitsisimanerat pillugu pineqaatissinneqarsimasut.

Tusagassiuuteqarfiit eqqartuussivimmi suliami qaninniarpallaarsimasut, taanna isumaqarpoq.

Kalaallit nukappiarartaat marluk issuertissimanerarlugit salluliorluni oqaluttualiarisimavaa. Allaaserineqarneralu nutaarsiassatut ilusilersorneqarsimalluni. Allaaserisap ataani "Fake News rapporterer", taanna allassimavoq.

Oqariartuutigisani tigulluarneqannginnerat pissutigalugu taama iliorsimavoq.

Tamanna ajorluinnarpoq, Dansk Journalistforbundimi siulittaasoq, Lars Werge isumaqarpoq.

- Politikeri eqqarsallaqqippoq, tusagassiuuteqarfittuulli tatiginassutsimik sorsuutilik, salluliorlunilu oqaluttualiorsimasoq.

- Mette Gjerskovi kukkuvoq. Uagut qanoq iliornissatsinnik kissateqarneranut attuumassuteqanngilaq, salluliorlunili oqaluttualiorsimanera salluneruvoq, taanna oqarpoq.

- Twitterimini salluliorluni oqaluttualiorsimanini ulloq ataaseq qaangiummat aatsaat nassuerutigimmagu tupigusuutingaara.

- Paasineqariaannaasoq, taanna eqqarsarsimavoq. Ersarilluinnartuusariaqarpoq aammalu isummap akerlianik oqaaseqartoqarnissaa mianersuutassaavoq. Naatsorsuutigineqartariaqarlunilu atuisut sunik tamanik paasinnittarnerat, Lars Werge oqarpoq.

Mette Gjerskovip salluliorluni oqaluttualiaa tusagassiuuteqarfinnit inuilli naapittarfiini oqallisigineqangaatsiarpoq.