Ministerit nikimmata ataatsimiinnissaq kinguartinneqarpoq

Maanna socialministeriusimasup Karen Hækkerupip (S) ukiuni marlunni socialministeriunermini Danmarkimi atugarliortut immikkut samminiarsimavai aammalu kalaallit meerartaat Nunatsinnilu inatsisitigut ataataqanngitsunut tunngasoq sammisorujussuusimallugit.
Tallimanngormat socialministereqarfik Annette Vilhelmsenimut, SF, tunniukkamiuk Karen Hækkerupip socialministerertaaq kalaallit erfalasuannik tunivaa.
Erfalasuaqqat pisiarineqarsimapput ataasinngornermi ataasimiinnissamut, tassani socialministeri peqqissutsimullu Naalakkersuisoq Steen Lynge ataatsimiittussaagaluarmata.
– Ataatsimiinnissarli maanna taamaatinneqarpoq naluarpullu ataatsimiinneq ingerlanneqassanersoq, socialministereqarfiup tusagassiornermik sulisuva Sermitsiaq.AG-mut paasissutissiivoq.
Ministereeqarfiup tunniunneqarnera misigisaq sakkortuujuvoq. Karen Hækkerup qiangajavippoq ministereqarfik tunniukkamiuk.
– Maanniinera nuannarisimaqaara, taanna oqarpoq unillatsiarlunilu isummani katersorniarlugit.
– Nutaamili aamma tamaviaarussissaanga, tassami assigiinngisitsinissaq pineqarpoq. Uannut taamaappoq, nalunngilaralu ilinnut aamma taamaattoq, taanna Annette Vilhelmsenimut oqarpoq, taamatut allappoq Politiken.
Siumut tunuliaqutaralugu folketingimut ilaasortap Doris Jakobsenip neriuutigaa Danmarkimi kalaallit atugarliortut Anne Vilhelmsenip samminerat nangissagaa.
– Soorunami neriuutigaarput socialministerip nutaap, Annette Vilhelmsenip, Danmarkimi kalaallit atugarliortut sammineqarluarnerat attatiinnassagaa, Doris Jakobsen tunniussineq pillugu naatsumik oqarpoq.