Pituffik
Ministerip Pituffimmut suliariumannittussarsiornermut suliaq USA-mut unitsikkallaquaa
Kalaallit Nunaata Danmarkillu USA-mut kissaatigaat Pituffimmi kiffartuussinissamut suliariumannittussarsiornerup atorunnaarsinnissaa, Danmarkip nunanut allanut ministeria Martin Lidegaard oqarpoq
Nunanut allanut ministerip, Radikale Venstreneersup Martin Lidegaardip, USA sisamanngornermi piumaffigaa Pituffimmi kiffartuussisussarsiornermut suliaq unitsissagaa.
Taama nunanut allanut ministeri finans.dk-mut oqarpoq.
Taama toqqaannartigisumik piumasaqarneq pivoq Nunanut allanut ministeriaqarfimmi amerikamiut Danmarkimi aallartitaanik, Rufus Giffordimik, ataatsimeeqateqarnermi. Ataatsimiinnermi tassani Lidegaardip qallunaat kalaallillu Pituffimmi kiffartuussinermut suliariumannittussarsiornermut tunngatillugu isummersuutaat anngussimavai.
- Aamma tassani kaammattuutigivara amerikamiut silaannakkut illersornissamut sakkutooqarfiata kiffartuussisussarsiorneq atorunnaarsikkallartariaqaraa USA-p, Kalaallit Nunaata Danmarkillu aaqqiissutissamik nassaarnissaasa tungaanut, Martin Lidegaard Finansimut taama oqarpoq.
Nunanut allanut ministerip amerikamiut akissuteqarnissaat maanna utaqqivaa.
Taarsiullugu Martin Lidegaardip Danmarkimi naalakkersuisut avaqqullugit Lidegaardi USA-mut piaarnerpaamik Pituffimmi kiffartuussisussarsiorluni suliap unitsinneqarnissaanut pingasunngornermi amerlanerussuteqarlutik kissaateqartut akissuteqarfigai.
Pituffimmi kiffartuussinissamut isumaqatigiissut aningaasarpassuarnik naleqartoq amerikamiunit Vetrusimit, Exelis Services A/S-imik piginnittunit, ajugaaffigineqarpoq.
Isumaqatigiissut septembarip naaneranit atuutilissaaq ukiunilu arfineq marlunni atuutissalluni. Isumaqatigiissut katillugit 2,4 milliarder koruuninik naleqarpoq.
Danmarkip, Kalaallit Nunaata USA-llu 2013-imi qaammatini arlalinni isumaqatiginniutigivaat isumaqatigiissutip qallunaat imaluunniit kalaallit suliffeqarfiinut, illersornissamut inatsisit 1950-kkunneersut najoqqutaralugit, tunniunneqarnissaa.
Atuaruk: Qujaukitsup Danmarki isornartorsiorpaa: Iliuuserineqartoq toqqissisimanartinngilara
Atuaruk: Politikkerit sivikitsumik Pituffimmiittut
Kisianni Danmarkip EU-p unammillernissamut malittarisassaanut unioqqutitsisumik inississinnaanera ernummatigalugu kiffartuussinissamut isumaqatigiissut amerikamiunut tunniunneqarpoq. Tamannalu pivoq Kammeradvokatip 2013-imi aasakkut mianersoqqusereernerata kingornagut.
Suliffeqarfissuit pingasut - taakkunani Greenland Contractors ilaalluni - kiffartuussinissamut isumaqatigiissummut tigusiniarlutik neqeroortut, Exelis Services naammagittaalliutiginikuuaat, isumaqaramik suliffeqarfiup suliariumannittussarsiornermi piumasaqaatit naammassisimanngikkai.
Amerikamiut suliariumannittussarsiuussinermi naammagittaalliortarfiata, Government Accountability Officep, februaarip 18-ani aalajangernera isumaqarpoq Exelis Servicesip Pituffimmi kiffartuussinissamut isumaqatigiissut septembarip 30-anit tigussagaa.
Pituffik pillugu allaaserisat allat uani atuakkit