pilluarit
Minik Rosingip oqallissaarisuunera nersorneqaatigaa
Geologimi profesori Minik Rosing marlunngormat Tøger Seidenfadenip nersornaasiuttagaanik nersornaasitinneqarpoq. Danmarkimi nunatsinnilu oqallissaarisuunera pissutaalluni nersornaaserneqarpoq
Minik Rosing nersorneqaqqippoq. Tøger Seindenfadenip nersornaasiuttagaanik nersornaaserneqarmat inuppassuit peqataapput. Nersornaat tunniunneqartarpoq inummut isornartorsiorneqarsimasumut isummersornertik pissutigalugu, nersornaallu Minik Rosingimut marlunngormat tunniunneqarluni Københavnimi.
- Minik Rosing nersornaaserneqarpoq misissuisartuummat nalinginnaanngitsoq kiisalu aamma nassuiaallaqqissuulluni, nersornaasiisoq Tine Eiby nersornaat tunniunneqarnerani oqarpoq.
- Nersornaaserneqarneranut ilaavoq oqallinnermi nalunartumi, Kalaallit Nunaatali siunissaanut pingaarutilimmi Minik Rosing siuttuummat, siunissami qanoq ineriartortoqarnissaanik oqallissaarisuuvoq, Kalaallit Nunaata Danmarkillu siunissami ataqatigiinnissaanik oqallittoqqartarluni kiisalu Kalaallit Nunaanni aatsitassat pillugit aningaasaqarnermut anguniagassartai qanorlu atorluarneqarsinnaanerinut Minik Rosing oqallinnermi qiniummat, Tine Eiby oqarpoq.
Nuannaartoq oqallissaarisorlu
Nersornaaserneqartup suliani paasineqarluarsimasut nuannaarutigaa kiisalu oqallilluartoqarnera aamma nuannaarutigalugu.
- Maannakkut nuannaarpunga. Nersornaaserneqarnera kisimi nuannaarutiginngilara, aammali Kalaallit Nunaat Danmarkillu oqallinnerat annertummat nuannaarpunga, nersornaatisereernermi Minik Rosing Sermitsiaq.AG-mut oqarpoq.
- Nunat ataqatigiinnerisa ineriartorteqqinneqarnissaannut suleqataarusunneruvunga. Sapinngisagummi ataatsimoorluta ujartorsinnaavagut ineriartorteqqillugillu. Ukiunimi 300-ni ataqatigiinnikuuvugut, Minik Rosing oqarpoq. Nersornaammut tunniunneqartumut oqalugiarnermini Hans Egedep Kalaallit Nunaannut pinera nuannersunngorlugu oqaluttuaraa.
- Danskit illoqarfiisa ilaanni Brønderslevimisut issimassaaq 50-ikkunni, taamani rock'n'roll aallarteruttormat. Oqaluttuassaqarpallaartoqarnikuunngilaq ukiuni amerlasuuni, oqaluttuatoqqat sammineqarnerusarlutik. Taavali inuit ilisimaneqanngitsut takkuteriasaarput, Minik Rosing ilaatigut oqalugiaammini oqaluttuarpoq.
Tøger Seidenfadenimik nersornaasiisarneq 2011-mi aallartinneqarpoq, Politikenip pisortarisimasaa Tøger Seidenfaden eqqaaniarlugu.