Minik: Nunarsuaq annaanniassanngilarput

– Silap pissusiata allanngoriartornerata kinguneqaatai Kalaallit Nunaanni isaannarnik takuneqarsinnaavoq. Nunarsuarli annaanniassanngilarput. Immitsinnut annaanniassaagut, nunarsuaq atassaqqaarpoq.
Marlunngormat DR P1-imi radiokut aallakaatitami ´Sommergæsten´ taamatut oqarpoq professori aamma Kalaallit Nunaanni aatsitassarsiorneq pillugu qallunaat-kalaallit immikkut ilisimasalittut gruppianni siulittaasoq Minik Rosing.
– Kalaallit siunissaat assigiinngitsorpassuarnik tunngaveqarpoq. Tamakkua ilagissavaat aatsitassarsiorneq. Aatsitassarsiornikkut inuiaqatigiit kissaatigineqartutut ilusilersorneqassapput, inuiaqatigiit aningaasartuutaat matussutissiinnarnagit, Minik Rosing radiokut aallakaatitami oqarpoq.
– Ilaasas aatsitassarsiorneq eqqorniaanermi billetsitut isigaat, billetsilu taanna pisiarigutsigu aningaasarpassuarnik eqquissaagut, tamakkualu qallunaat ataatsimut tapiissutaannut taarsiullugit atorsinnaavagut, taavalu pisarnitsitut ingerlaqqiinnassaagut, aningaasammi allaminngaanniiginnarput. Taamatut isiginninneq soqutiginanngilaq, Minik Rosing isumaqarpoq.
– Isiginiartariaqarpoq illoqarfiit qanoq ilulisilersorneqarsinnaanersut inuillu tikisikkumasat nunamut tikisillugit imaluunniit taamaasiorani. Oqaluuserineqartariaqarpoq inuiaqatigiit qanoq ittut kissaatiginerivut? Aamma pingaaruteqarpoq puigussanngikkipput suut pikkoriffiginerlutigit, Minik Rosing oqarpoq.
Aallakaatitassiaq tusarnaaqqissinnaavat uani
Minik Rosingip aalisarneq tikkuarpaa, Kalaallit Nunaata misilittagaqarfigisaa ingerlatissallugulu pikkoriffigisaa.
– Nunarsuarmi imavissuit tamarmik aalisagaarutsinneqarsimapput aalisarpallaarnikkut. Kalaallit Nunaata, Islandip, Norgep avannaata killilimmillu Canadap eqqaanni immat sumiiffiit kingulliupput nungusaataanngitsumik aalisarfiusinnaasut. Taamaattumik nalissaqanngitsunik pisuussuteqarpugut piumaneqaleraluttuinnartunik.