assammik arsarneq
Minik Dahl Høegh GOG-mi unammisartuujunnaassaaq
Sulili ilisimaneqavinngilaq klubbissaa nutaaq qanoq ateqarnersoq
Sivisuumik ilisimaneqarsimavoq Minik Dahl Høeghip GOG-llu pisortaata Kasper Jørgensenip isumaqatigiinniarnerat piffissami kingullermi nikeriarfiusimanngitsoq.
Qaammatialunnguit matuma siornatigut isumaqartoqarsimagaluarpoq suut tamarmik inissinnissaannut piffissaq kisimi apeqqutaasoq. Taamaattoqanngilarli.
Uninnissani uppernarsarpaa
Minik Dahl Høeghip uppernarsarpaa sæsonip tullianit GOG-mi unammisartuujunnaassalluni.
– Soorunami allanik (klubbinik, aaqqiss.) oqaloqateqarpunga, maannakkorpiarlu annerusumik oqaaseqarsinnaanngilanga. Klubbertaava aqqa nalunaarutigineqarumaarpoq isumaqatigiissut atsiorneqareerpat, Minik Dahl Høegh Sermitsiaq.AG-mut oqarpoq.
Århus Håndbold ilimanarsinnaavoq
Danmarkimi nettimi tusagassiorfiit arlallit, minnerunngitsumillu Fyens Stiftstidendep, isumaliutersuutigaat backip saamerliup sakkortuumik isertitseriartartup klubbia nutaaq tassaassagunartoq Århus Håndbold.
Tassami Århus Håndbold backimik saamerlermik amigaateqarpoq, tassani unammisartuat siulleq sivisuumik atugassaminik ajoqusersimammat.
GOG-mi suliaq naammassineqassaaq
Minik Dahl Høegh soorunami sæsonip sinnerani GOG-miiginnassaaq. Siullermik maajip 11-anni Aalbrog Håndbold unammissavaat, taavalu semifinalit marluk, qularnanngitsumik sapaatip akunnerani tullermi ingerlanneqartussat, taavalu finalimut anngutissagunik GOG-miinnermini fynimiut oqaluttuarisaaneranni angusarissaaqqissaaq.
Minik Dahl Høeghip piffissami kingullermi Sermitsiaq.AG neriorsorsimavaa sivisujaamik apersorsinnaagipput, suna pissutigalugu GOG-mit anilluni sæsonimi tullermi klubbimi allami unammisalissanerluni.