soraarnerussutisiat

Millionilikkaat soraarnerussutisianeersut salliuniuuffigineqartut

Innuttaasut soraarnerussutisianut akiliutaannik pissarsiniunneq aallartiinnaqaaq. Soraarnerussutisiaqalernissamut aningaasaateqarfik SISA, maannamut sulinermik inuussutissarsiuteqartunuinnaq atorsimasoq, atorfilinnik tikilluaqqusillutik suliffeqarfimmik isumaqatigiissuteqarfeqarpoq

SISA-p suliffeqarfimmut isumaqatigiissuteqaqqammerpoq, taanna atorfilinnut tunngasuuvoq.

2017-ip aallartinneqarani akileraartarnermut inatsit nutaaq atuutilerpoq, sulinermik inuussutissarsiuteqartut taamaalillutik ingerlatseqatigiiffinnut nunanit allaneersunut nuussinerminni akileraartarnermut ilanngaatinik pissarsinnaajunnarput, tassani Danmarkimi ingerlatseqatigiiffiit aamma pineqarput.

Niuerneq pilerinartoq
Inatsisip taassuma atuutilerneratigut aningaaserivinnut aamma kalaallit soraarnerussutisiaqalernissamut aningaasaateqarfianut SISA-mut niuernermik nutaamik pilerinartumillu ammaassisoqarpoq.

PFA Soraarneq, danskit soraarnerussutisiaqalernissamut aningaasaateqarfiani PFA-mi aallaaveqartup, ukiup ingerlanerani matusussanngorluni siornatigut nalunaarutiginikuuaa. Taanna aamma ingerlatseqatigiiffiit nunanit allaneersut atuisunik maanna pilerngunneqartunik qimataqarput.

2016-ip naanerani sulinermik inuussutissarsiuteqartut ingerlatseqatigiiffiata SISA-p niuerfimminik allileriniarluni aalajangiuppaa, taamaalilluni ilaasortanut SIK-mut akissarsianut isumaqatigiissuteqartunuinnaq atorneqarunnaarniarluni. Tassani soraarnerussutisiassanut akiliutit pilerinartut pissarsiarinissaat siunertarineqarpoq.

Nioqqutissamik nutaamik sanasoqartariaqarsimavoq, atuisut nutaat atorfiliussammata akissarsiaqarnerullutillu.

Isumaqatigiissut siulleq inissittoq
- SISA-mi suliffeqarfimmut isumaqatigiissut siulleq atsioqqammerparput, pisortaq Søren Schock Petersen, SISA, Sermitsiaq.AG-mut oqarpoq.

Isumaqatigiissut atorfilinnut 50 Brugsenimiittunut tunngavoq, SISA-milu pisortaq ilisimatitsivoq, kalaallit suliffeqarfiinik isumaqatigiissuteqartoqaqqikkumaartoq.

Aamma atuaruk: Aarit: Ilaasortat 34.500-t 455 millionit koruuninik aningaasaateqarnerulertut

- KNB-p soraarnerussutisiaqalernissamut aningaasaateqarfimmik Kalaallit Nunaanniittumik suleqateqalernini nuannaarutigisorujussuuaa, taamaattumillu atorfilittagut soraarnerussutisiaqarnissamut sillimmasiinertaqartumut akileraarutinullu iluaqusiinermik isumaginnittumik neqeroorfigisinnaavagut, Brugsenimi pisortaq Susanne Christensen ilisimatitsivoq, SISA-p nioqqutaa sulisup ukiui naapertorlugu nalimmassartartoq oqaatigaa.

Grønlandsbanken tusiattoq
Suliffinnut isumaqatigiissusiortoqarsinnaanissaanut ilungersorluni suliniuteqartoqartoq, Grønlandsbankenimi pisortaq Martin Kviesgaard Sermitsiaq.AG-mut ilisimatitsivoq.

- Aallartereerpugut, sapaatip-akunneri arlaqanngitsut qaangiuppata suliffeqarfinnut atuisunut neqeroorutinik nutaanik piariigaqarnissarput naatsorsuutigaarput, Martin Kviesgaard ilisimatitsivoq.

SISA-p pisortaa Brugsenip isumaqatigiissuteqarfiginnginnerani sulineq pillugu ima oqarpoq:

- Ilaasortat assigiinngitsillugit soraarnerussutisianut aaqqiissutit assigiinngitsut pisariaqartinneqarput. SISA-p tamanna ukiuunerani sulissutigisimavaa. Ilaasortat kalaallit suliffeqarfiini atorfilittut sulisut tigunissaanut piareersimanissaq suliassami qitiusimavoq, maannalu piareerpugut. Tamanna aqqutigalugu SISA soraarnerussutisianut aningaasaateqarfik siornatigornit allaaninngorpoq: SIK-mi akissarsianut isumaqatigiissuteqartunut soraarnerussutisianik aqutsisuunermit Kalaallit Nunaanni tamanut soraarnerussutisianut aningaateqarfinngorluni.

Powered by Labrador CMS