avaleraasartuut
MIllionilikkaanik avaleraasartoortassiinerit pillugit Aalisarnermut Ataatsimiititaliaq akissuteqaqqisivoq
Avaleraasartoortassanik agguaassineq assortuussutigineqartoq pillugu ataatsimiititaliami amerlanerussuteqartut ersarissumik akineqarnissartik suli ujartorpaat
Ukioq manna Tunup imartaani avaleraasartoortassanik katillugit 85.000 tonsinik Naalakkersuisut agguaassinerat ataatsimiititaliami amerlanerussuteqartut suli isornartoqartippaat.
Agguaassineq assortuussutigineqarsimavoq, minnerunngitsumik pissutigalugu umiarsuaatileqatigiit, siorna avaleraasartoortassinneqarsimasut, 2015-imi pisassinneqarsimanngimmata, taamatuttaarlu umiarsuaatileqatigiit ilaat, ukioq manna pisassinneqartut, kikkunnit piginneqataaffigineqarnerat isornartorsiorneqarsimalluni.
– Allakkatigut apeqquterpassuit saniatigut Naalakkersuisut siulittaasuannik arlaleriarluni isumasioqatigiinnikkut apeqqut tunngaviusoq akissutisarsineqartarsimanngilaq: Kikkut pisassinneqarpat aamma suna pissutigalugu? Amerlanerillu misigisimapput apeqqutit, ataatsimiititaliaannaanngitsup inuiaqatigiilli tamarmik agguaassineq pillugu apeqqutigisaat, Naalakkersuisut akisinnaallugillu akisinnaasariaqaraluaraat, ataatsimiititaliami amerlanerussuteqartut tusagassiorfinnut nalunaarutikkut erseqqissaapput.
Suut tamaasa saqqummiussigik
– Suliassap sivitsorsarneqarnera kialuunniit iluaqutigisinnaanngilaa. Taamaattumik Aalisarnermut Ataatsimiititaliami amerlanerussutillit Naalakkersuisunut kajumissaarutigissavaat suut tamaasa saqqummiuteqqullugit - paasissutissanillu attuumassutilinnik piviusunik tamanik saqqummiussillutik, pisimasoq piaarnerpaamik iluanik tamakkiisumillu qulaajarneqarniassammat, ataatsimiititaliami amerlanerussutillit erseqqissapput.