Aningaasanut inatsit 2015

Millionerpassuit ima agguataaneqarput

Aningaasaqarnermut inatsit aqagu isummerfigineqassagunarpoq. 64 million koruuninik amigartoortoqarnissaa naatsorsuutigineqarpoq

Naalakkersuisut aningaasanut inatsit aqagu marlunngornermi isummerfigissavaat

Visit Greenlandimut sipaarniarneq annikillineqarpoq, aamma Inip inissianut aaqqissuusseqqinnissaanut aningaasaliisoqarpoq. Aningaasanut inatsip 2015-meersup ukiup affaata missaani suliarineqarnera pissanganarsiartuinnavippoq.

Aningaasaqarnermut naalakkersuisup Demokraatineersup Anda Uldumip aningaasanut inatsimmi amigartoortoqarnissaa pillugu oqariartuuteqareerpoq. Illuatungiliuttuugallarami killormut isumaqartarsimagaluartoq.

Amigartoorutigineqartussat ikinnerusut
76 million koruuninik amigartoortoqarnissaa siunnersuutigineqarsimasoq 64 million koruuninik amigartoortoqarnissaa siunnersuutigineqarpoq.

Siunnersuutigineqartoq Inuit Ataqatigiinnit Partii Naleqqamiillu ilalertinneqanngilaq. Ukiut pingasut qaangiuppata sinneqartoorluni ingerlalernissaq naatsorsuutigineqarpoq.

Aningaasanut inatsimmut siunnersuut Siumumit, Atassummit Demokraatiniillu suliarineqartoq marlunngornermi oqallisigineqassaaq isummerfigineqassallunilu. Allannguuteqartoqangaatsiarnissaa naatsorsuutigineqarpoq.

Ima agguaasoqarpoq
Visit Greenlandimut sipaarutiginiarneqartut ikilineqarput, Nunatta kujataani savaatilinnut aningaasanik amerlanerusunik tapiisoqarniarpoq, taamatuttaaq Great Greenlandimut aamma million koruunerpaalunnik tapiisoqarniarpoq.

Inuusuttut amerlanerusut ilinniartinniarlugit suliniummut Piareersarfik 8 million koruuninik aningaasalerneqassaaq. Inissiaatileqatigiiffik Inimut 10 million koruuninik Naalakkersuisut aningaasaliissapput, iluarsartuusseqqinnernut aamma aningaasaliisoqaqqikkumaarluni.

Isumaqatiginninniarnerit
Siusinaartumik utoqqalinersiuteqartunut, ineqarnermut akileraartarnermut aamma utoqqalinersiaqalernissamut akileraartariaaseq aaqqissuuteqqinneqassapput.

Naalakkersuisooqatigiit aningaasanut inatsimmut siunnersuutaat aqagu marlunngornermi isummerfigineqassaaq, illuatungiliuttunit Inuit Ataqatigiinnit Partii Naleqqamiillu akuersiffigineqartussaanngitsumik. Aningaasanut inatsit suliarineqareeriarpat aningaasanut inatsit 2016-moortoq suliarineqalissaaq. Taanna sapaatit akunneri arfinillit qaangiuppata isummerfigineqassaaq.

Powered by Labrador CMS