Sportsligt
Miki Heilmann angerlaqqippoq
Qallunaat klubbersuanni KIF Kolding København-imi sapaatip akunnera ataaseq sungiusareerluni assammik arsarluni nunanut allanut unammisartoq Mike Heilmann Nuummut uteqqippoq
Miki Heilmann sapaatip akunnerani kingullermi assammik arsarluni ulapissimavoq. KIF Kolding København sisamariarluni sungiusaqatigai. Kalaallit Danmarkimi assammik arsartartut ataasiarluni sungiusaqatigalugit, sapaatillu akunnerata naanerani nunanut allanut unammisartut Nunatsinni unammisartuusut sungiusaqatigalugit.
Sisamanngormat KIF Kolding København-imi sungiusaqataanera Sermitsiaq.AG-p malinnaaffigaa. Sungiusarneq aqunneqarpoq sungiusaasuunermit Henrik Kronborgimit sungiusaasullu ikiortaanit Bilal Sumann-imit. Miki Heilmannip Danmarkimi assammik arsallaqqinnerpaasa ilaat sungiusaqatigai. Ilaatigut Lars Jørgensen, Lasse Boesen, Torsten Laen minnerunngitsumillu målmandi Kasper Hvidt. Kingulliup pisarnermisut suaartarluni Miki Heilmann nersualaartarpaa.
Mike Heilmann sungiusarpoq aallussilluartorujussuulluni, periarfissaqaleraangat periataartarluni, taamaattumik neriulluarnarpoq.
Atuaruk: "Imaannaanngitsunik misigisaqassaaq"
Sungiusaasuuneq naammagisimaarinnippoq
Sermitsiaq.AG-p sungiusarnerup kingorna sungiusaasuuneq Henrik Kronborg oqaloqatigaa, taassumalu Miki Heilmann malinnaaffigisimavaa U-21-mi unammisartut juunimi Nuummiinnerisa kingornali, Henrik Kronborgilu ilaatigut oqarpoq:
– Miki Heilmann assammik arsallaqqissuuvoq arsarnermik paasisimasaqarluartoq, nangaassuteqarani minnerunngitsumillu sukkasuumika arsartartoq. Takusakka ajorinngeqaakka. Klubbitsinni uagutsitut ittumi ilimaginngisanik pisoqartuartarpoq, taamaattumik ajoqusernerit pissutigalugit tassanngaannaq arsartartut ineriartortitassat unammisalersarput. Miki Heilmann attaveqarfigaarput sapaatillu akunnerata ataasip missaa qaangiuppat oqaloqatigissavaraput, taavalu takujumaarparput qanoq pisoqassanersoq, Henrik Kronborg Sermitsiaq.AG-mut oqarpoq.
Misigisaq annertooq
Miki Heilmannimut sapaatip akunnera pissanganartuusimavoq. KIF Kolding København-imi sungiusarneq sumilluunniit peqqissiminarsimanngilaq. Sermitsiaq.AG-mut imatut oqaatigaa:
– Sapaatip akunnera nuannersimaqaaq. Aappara ilagaara Koldingimilu tikilluaqquneqarluaqaagut. Unammisartut ilisarisimanngisat arsaqatigalugit ajornakusooraluartoq isumaqarpunga ajunngilluinnartumik ingerlasimasoq.
– Maanna akademiøkonom-itut ilinniagaqarnera naammassereerakku Danmarkimi assammik arsartalernissannut siusinnerusutut tunuarsimaarfigiunnaarpunga. Nuannissagaluarpoq.
Sapaatit akunnerini aggersuni pissanganassaaq malinnaaffigissallugu KIF Kolding København aamma Miki Heilmann isumaqatigiissuteqassanersut. Miki Heilmann maanna GSS-imi unammisartuugallarpoq.