Godkendelser
Miitip pinnersaatissanut pisinnaatitsissutini utertittariaqaraa
Qinigaanerup Misilinneqarnissaanik ataatsimiititaliap ineqarnermut naalakkersuisoq sakkortuumik naveerpaa, inuussutissarsiornikkut soqutigisaminik pigisaqaannarnissaminik qinnuteqaatini juunip qeqqani aatsaat tunniussimammagu
Qinigaanerup Misilinneqarnissaanik ataatsimiititaliap Ineqarnermut, pinngortitamut aamma avatangiisinut Naalakkersuisoq Mette Lynge, Miiti Lyngetut ilisimaneqarnerusoq naveerpaa oqaaqqissaarlugulu. Taanna ilisimatinneqarpoq Anori Art ApS aamma Piginneqatigiiffimmi Miiti ApS-imi soqutigisaminik ingerlatsiinnarsinnaaneranik.
Taamaattoq ujaqqanik pinnersaasiassanik annikitsumik piiaasinnaanermut pisinnaatitsissutini utertittariaqarpaa.
Naammaginanngitsoq
Miiti Lyngep inuussutissarsiornikkut soqutigisaminik ingerlatsiinnarsinnaaneranik nalunaarfigineqarnermi saniatigut, Qinigaanerup Misilinneqarnissaanut ataatsimiititaliaq allappoq, naammaginanngilluinnartoq taassuma qinigaanermi kingorna qaammatit marluk qaangiummata aatsaat qinnuteqaatini tunniummagu.
Qinigaanerup Misilinneqarnissaanut Ataatsimiititaliap, Ineqarnermut, Pinngortitamut Avatangiisinullu Naalakkersuisumit qinnuteqaataa aatsaat juunip 13-iani tiguaa. Ataatsimiititaliamit Mette Lynge erseqqissaavigineqarpoq, ataatsimiititaliamit taamak kingusitsigisukkut qinnuteqartoqarnera naammagineqanngilluinnartoq. Mette Lyngep tamanna tusaatissatut tiguaa pisorlu ajuusaarutigalugu.
Qinigaanerup Misilinneqarnissaanut Ataatsimiititaliaq allappoq, siunissami qinikkat qinigaaginnarlutilli politikkimik ingerlatsinermik saniatigut inuussutissarsiutiminnik ingerlatsiinnarsinnaanerminnik qinnuteqartaleqqullugit.
Ataqqinninneq
Ataatsimiititaliamit erseqqissaatigineqarpoq piumasaqaatit inatsisinik tunuliaqutaqartut malinneqartariaqartut, Naalakkersuisut ilaasortaaffimminnik imaluunniit inuussutissarsiutiminnik ingerlatsiinnarnissamik kissaatillit, qinigaanermik kingorna Qinigaanerup Misilinneqarnissaanut ataatsimiititaliamut tamanna qinnutigisassagaat, inuiaqatigiit Naalakkersuisunik tatiginninnissaat pigiinnarniarlugu. Ataatsimiititaliamit neriuutigineqarpoq siunissami Inatsisartut sulinerat aamma inatsisit atuutut annermik ataqqineqartariaqartut, Evelyn Frederiksen, Qinigaanerup Misilinneqarnissaanut ataatsimiititaliap siulittaasua allappoq.
Steen Lynge, Atassummeersup qinnuteqaataa Ataatsimiititaliamit maajip aallaqqaataani tiguneqarpoq, taannali kingorna tunuartippaa. Tamatuma saniatigut Inatsisartut siulittaasuat Lars-Emil Johansen taamatuttaaq maajip aallaqqaataani ataatsimiititaliamut qinnuteqaammik nassiussivoq, ataatsimiitaliamillu akuersissummik tunineqarlutik Kalaallit Nunaanni Timersortartut Kattuffiannik illersuisutut atuutsiinnarsinnaasoq taamalullu Kulturfondenimi Danmark-Grønland ilaasortaaginnarsinnaalluni.
Ataatsimiititaliamit qinnuteqaatinik allanik tigusaqartoqanngilaq.