Michael Rosing Demokraatiniit tunuarpoq

Michael Rosing Demokraatiniit tunuarpoq.

- Demokraatit politikkimik ingerlatseriaasiat peqataaffigisinnaajunnaarpara. Demokraatini ilaasortaanera tulluusimaarutiginikuuara, tamannalu qanganngorpoq. Politikkikkut suliniutit peqataaffigisinnaanngisakka amerlavallaaqaat, taanna tunuarluni nalunaarummini allappoq.

Upernaakkut ataatsimiinnermilu Michael Rosing partiimilu aqutsisut akerleriilereersimapput. Taamani Michael Rosingip suleqatigiuminaatsinneqarnini pissutigalugu oqaaseqartartuuffini tamaasa annaavai.

Kingornalu nalunaarutigineqarpoq illuatungeriit isumaqatigiileqqissimasut. Eqqisseqatigiinnerlu sivisuumik pisinnaasimanngilaq.

- Taamatut aalajangerneq oqitsuinnaanngilaq, aliasuutigaaralu partiimit anisariaqalernera. Atorfimmi ileqqorlunnermut, kammalaatersornermut, piuaannartitsinermut, kiffaanngissuseqarnermut ammasuunissamullu anguniagaqarnermik suleqatigisimasakka qutsavigaakka, Michael Rosing tunuarluni nalunaarummini allappoq.

Michael Rosingip Demokraatinut isumaqataanngiffigisani quleqquttat arlallit eqqaavai.

- AI 2017-imut taasinermi D-it raajartassiissutit 50-50-mik agguaanneqartalernissaannut taaseqataapput. Tamanna D-it politikkianut naapertuutinngilaq, taanna allappoq.

Tasiilamut immikkut 5 millionit koruuninik aningaasaliissuteqartoqarnissaanik partiip siunnersuuteqarneranut, taanna aamma isumaqaataanngilaq.

- Aningaasat sumut atorneqassaneri pilersaarusiorneqarsimanngilaq. Naliginnaasumik politikkikkut isumatsinnut naapertuunnani aalajangiiffigisassatut siunnersuutinngortinneqarpoq aningaasanullu inatsisissatut siunnersuummi isumaqatiginniutigineqarani. Sumiluunniimmi tunngavissaqanngitsumik immikkoortitsisoqassanngitsoq politikkikkut isumaqartuarsimavugut. Tunngavissarlu takusinnaasatuara tassaavoq Justus Hansen Taasiilaminngaanneersoq, najukkaminilu iluarisimaarneqarnissaanut periarfissamik atorluaanerinnaalluni.

Aamma Michael Rosing isumaqarpoq, Ilanngaassivik Demokraatit naleqartitaanut naapertuutinngitsoq.

- Innuttaasut meeqqatut sianigisaqanngitsutut nammineersinnaanngitsutut iliuuseqarfiginissaat kissaatigineqarpasippoq. Innuttaasut nammineersinnaanngitsut kissaatigigaanni, meeqqatut pineqalertarput. Tamanna uanga kissaatiginngilara.

- Assuutitut taasakka aalajangiinerlunnernut aamma eqqarsarluarani politikkikkut suliniutit ilamininnguaraat. Iluarnerusimassangaluarpoq gruppitta iluani tamakku pillugit oqaloqatigiittarsimasuugutta aammalu siulersuisuunerit akisussaaffimminik paarinnilluaraluarpata, Michael Rosing parteerisimasaminut nalunaarutaani allassimavoq.