Future Greenland
Michael Binzer pissutaalluni Naalakkersuisut peqataajumannginnerat IA-mit pakatsissutigineqarpoq
Naalakkersuisut Future Greenlandimut inuk ataaseq pillugu peqataajumannginnerat Inuit Ataqatigiinnit pakatsissutigineqarpoq
- Future Greenlandimut peqataajumajunnaarneq pimoorussinnginnerullunilu naapertuutinngilaq.
Inuit Ataqatigiinni siulittaasoq Sara Olsvig AG-mi allaaserineqartoq qisuariaateqarfigaa. Naalakkersuisut Kalaallit Nunaanni inuussutissarsiortut ataatsimeersuarnissaasa annersaanni, Future Greenlandimi, majimi pisussami peqataatitsiumajunnaarsimasut aviisimi atuarneqarsinnaavoq. Tunngavilersuutigineqarpoq oqalugiartussat ilaat, Michael Binzer, akueriumanagu taamatut aalajangertoqarsimasoq. Naalakkersuisut inuk eqqunngitsuliorsimasoq inimeeqatigerusunnagu nassuiaapput.
- Inuit Ataqatigiinniit Binzerip CV-imini eqqunngitsuliorsimanera soorunami aamma akuerinngilluinnarparput. Taamaasiorneq annertuumik sianiilliorneruvoq, malitsigalugulu Binzerip tatigisaajunnaaneranik kinguneqarnera paasilluarsinnaavarput. Kisiannili Naalakkersuisut Future Greenlandimi peqataajumajunnaarnerat aamma isumaqatiginngilarput, Inuit Ataqatigiinni siulittaasoq oqarpoq.
Michael Binzer, CV-mini eqqunngitsumik paasissutissiisarsimanini 2014-mi nassueruteqartoq, Future Greenlandimi oqalugiartussatut qaaqquneqarpoq. Sulisitsisut Peqatigiiffiata aaqqissuussaani pilersaarummi atuarneqarsinnaavoq Binzer 'Namminersorlutik Oqartussat aamma pisortat suliffeqarfiutaasa akornanni pissutsit' pillugit oqalugiartussaasoq.
Ataatsimeersuarneq pingaaruteqartoq
Kingullermik 'Future Greenland' Nuummi – 2013-mi februaarimi – ingerlanneqarmat peqataasut 450-it pallippaat. Tassani naalakkersuisuusimasut aallartitaat nuimasut, soorlu Inuit Ataqatigiinnit Kuupik Kleist aamma aningaasanut naalakkersuisoq Maliina Abelsen, oqalugiarput.
- Ataatsimeersuarfik Future Greenland inuppassuarnit, nunatsinniit nunaniillu allaniit inuussutissarsiortunit peqataaffigineqartarluni annertusiartuinnarsimavoq. Tassaniluuna Kalaallit Nunaat inuussutissarsiornikkut soqutigisaqarnerminik takutitsisussaasoq – tamannami partiit tamakkerlutik eqqartugaraat. Aningaasaqarnikkut siuariarnissaq angussagutsigu inuussutissarsiornikkut ineriartortitsinerup politikkikkut samminissaa pinngitsoorsinnaanngilarput. Inuussutissarsiornikkullu ingerlassaqartut aningaasaliisussallu qanimut naapissallugit periarfissanillu eqqartueqatigissallugit uagut kissaatigaarput, Sara Olsvig nassuiaavoq, oqaatigalugulu oqalugiartussat politikkerinit aalajangerneqartussaanngitsut.
Peqataajumannginnerat eqqarsarnartoqartoq
Naalakkersuisut peqataassanatik aalajangernerat Inuit Ataqatigiinnit 'eqqarsarnartoqartippaat'. Ataatsimeersuarnermi 'Siuariartorneq aamma atugarissaarneq – Kalaallit Nunaata ineriartornissaanut periarfissat' qulequtarineqassaaq.
- Siullertut oqalugiartussamik iluarinninnginneq pissutigalugu Naalakkersuisut kattuffiup programmiliorsimaneranik allannguisitsiniassappata tamanna pissusissamisoorsorinngilarput. Aappaattut Naalakkersuisut Future Greenlandimi peqataasitsiumajunnaarnerat inuussutissarsiutitigut ineriartortitsinissamik kissaateqarnerup uppernassusianik akornusiivoq, Inuit Ataqatigiit siulittaasuat oqarpoq, Naalakkersuisullu ataatsimeersuarnermi peqataanissaat kaammattorlugit.
AG allappoq Kim Kielsenip ikiortigilluagaa, Svend Hardenberg, naapertorlugu Naalakkersuisut arfineq-pingasut tamarmiullutik peqataajumajunnaarnermut sutigut tamatigut tunuliaqutsiisut.
Allaaserineqartut 'Naalakkersuisut Binzer peqatigiumajunnaarpaat' aamma 'Tunniutiinnarpunga' AG-mi nutaami atuarneqarsinnaapput. Aviisi ataani pisiariuk: