peqquserlunneq
Michael Binzer: Annertuumik kukkuluttorpunga
Pisortaanerusimasup Michael Binzerip ilinniagarisimasani pillugit paasissutissiisarnini eqqortuuneq ajorsimasut nassuerutigaa. - Taamaasiornera isumakkeerfigineqarsinnaanngilaq, inuttaa oqarpoq
- Ilinniagaqarnera pillugu paasissutissiisarninnut annertuumik kukkusumillu siornatigut allattarpunga - ilinniarfiit naammassisimanngisakka ilannguttarnikuuakka. Iliuuserisimasara isumakkeerfigineqarsinnaanngilaq, eqqortorli annippara.
Michael Binzer blogimini mbinzer.com-imi allappoq.
Ujakkaarnermi aamma unammisartuusimasoq, Kalaallit Nunaanni Danmarkimilu 1999-imit suliffeqarfinni angisuuni atorfeqartarpoq. Tele-Postimi pisortaanertut kingullermik atorfeqarpoq. Iliuuserisarsimasanilu unnuaq blogimini saqqummiuppai.
Sungiusaasutut ilinniagaqartoq
- Ilinniagarisimasanni paasissutissiigaangama ilinniarfiit naammassinikuunngisakka aamma ilanngullugit allattarpakka. Sungiusaanermut kisimi 'taamaallaat' ilinniagaqarpunga Norgep timersornikkut højskoleani. Ujakkaarneq aallunniarlugu ilinniagaraara, Michael Binzer allappoq.
- Ajuusaarutigaara ilinniakkat naammassisimanngisakka aamma allattarsimagakkit. Tamanna allanngortissinnaanngilara, Binzer oqarpoq.
- Sooruna maannakkut nassuerpit?
- Eqqortoq anguniarlugu taamatut aalajangerpunga sassarniarlunga. Ajuusaarpunga aamma utoqqatserpunga, Michael Binzer Sermitsiaq.AG-mut oqarpoq.
Naalakkersuisoqarfik misissuisoq
- Paasisinnaanngilara sooq Naalakkersuisut Siulittaasuata Naalakkersuisoqarfiani atorfeqartup ataatsip ilinniagarisimasakka misissuiffigilernerai. Namminersorlutik Oqartussat pillugit kiisalu kusanaatsuliornerit pillugit isummersortarnikka pissutaallutik aatsaat misissuiffigineqalerpat?, Michael Binzer aperaaq.
Michael Binzer Air Greenlandimi pisortaanertut atorfeqareernermi kingorna Tele-Postimi pisortaanertut atorfeqalerpoq 2013-mi apriilip aallaqqaataanit. Atorfimmit Michael Binzerip soraarniuteqarnera septembarip qulingani nalunaaruteqartoqarpoq.
Naalakkersuisut Siulittaasuata Naalakkersuisoqarfiani pisortap Svend Hardenbergip ataatsimeereeruni Sermitsiaq.AG-mit apersorneqassaaq.