Thursday, November 2, 2017 - 13:17

Mianersorit: Ilulissani teriannissat toraarneqartut

Assi.: arkiv
Teriannissamik takunnittoqarnerata kingorna Avannaani illoqarfimmi innuttaasut qinnuvigineqarput eqqagassaatiminnik eqqaanerminni peqqissaarusseqqullugit, pingaartumik nerisakunik imaqarpata.

Qaasuitsup Kommunia Ilulissani innuttaasunut kalerrisaarivoq illoqarfimmi avataanilu teriannissamik takunnittoqarsimasoq.

- Innuttaasut qinnuvigineqarput eqqagassaatiminnik eqqaanerminni peqqissaarusseqqullugit, pingaartumik nerisakunik imaqarpata. Imaassinnaavoq teriannissat perlileramik illoqarfimmut nerisassarsiortartut, kommuni nittartakkamini allappoq.

Innuttaasunut makku eqqumaffigeqquneqarput:

  • Maangaannaq nerisat sinnikuinik eqqaasoqaranilu ilioraasoqassanngilaq
  • Nerisat sinnikui eqqaavimmut/ilitsivimmut igissigit
  • Qimmit nerisassaat matoqqasumiitissigit - ammaannartumiitinagit
  • Qimmiutillit ullormut qimmitik qimmiliviullu misissornerani, immikkut teriannissat tumeqarnersoq maluginiassavaat tamarmillu ajunnginnersut
  • Terianniaq orninngisaannaruk perlerornermik nappaateqarsinnaammat
  • Angajoqqaat meeqqatik, inuusuttatik teriannissat pillugit nassuiaallik

- Terianniamik teriannissanilluunniit takusoqarpat taava kommunemi qimmilerisut pingaartuat attavigiuk oqarasuaammut nr.
54 42 40, kommuni nalunaaruteqarpoq.

Seneste nyheder / Nutaarsiassat kingulliit