uuttortaaneq
Mianersoqqussut: Politiit sukkalisaartartunik ujartuiniarput
Nuummi politiit piffissami aggersumi biilit sukkassusaannik uuttortaaniarput, taamaattumillu biilertut sukkavallaannginnissaannik mianersoqqusipput.
Uuttortaanerit illoqarfiit pingaarnersaanni sumiiffinni arlalinni pissasut, politiit nalunaaruteqarput.
Sukkavallaamik ingerlaneq akisusinnaavoq.
Ingerlatsisinnaanermut allagartamik arsaagaaneq
Aqqusinikkut annerpaamik 25 km/t-sorfissakkut 36 km/t-soraanni 2.000 koruuninik akiligassitsittoqarsinnaasoq, politiit ilisimatitsipput.
Sukkanerusumillu ingerlagaanni 6.000 koruuninik akiligassitsittoqarsinnaavoq, unioqqutitseqqikkaannilu ingerlatsisinnaanermullu allagartamik arsaarneqartussanngorsinnaalluni.
2016-imi sukkavallaartut 42-t
Siorna politiit nuna tamakkerlugu sukkavallaamik ingerlasut 42-t nalunaarsorneqarsimapput, tamanna politiit ukiumut 2016-mut nalunaarusiaanni atuarneqarsinnaavoq. Taakkunannga marloriaammik amerlanerusut ingerlatillutik mobilimik oqalunnertik pissutigalugu akiligassinneqartariaqarsimapput.