Salmonella
Mianersoqqussut: Forloren hare Brugsenimeersoq nerinagu
Inuussutissanut aqutsisoqarfiup puulukit nersussuaaqqallu akuleriissillugit igariaannanngorlugit aserortikkat Coopimeersut, Tulipimit tunisassiarineqartut, inuit 19-it salmonellamik napparsimalernerisa kingorna nerineqannginnissaat mianersoqqussutigaa.
Inunnit 19-iusunit taakkunannga marluk allamik nappaateqareersut toqusimapput. Nerisassiaq igariaannaq Kalaallit Nunaanni aamma tunineqarsimasoq Brugsenip KNR-imut uppernarsarpaa.
Pasineqartoq
Salmonellami tunillaanerit misissorneqarneranni forloren hare pasineqarpoq. Taannali nerisassaq bakteerianik siammarterisuunersoq misissuinerup paasinarsisinngilaa.
- Suliaq taanna paasisaqarfiginiarlugu ilungersorluta sulivugut, suminngaanneernera siammarterfialu nungusinniarlugu, Inuussutissanut aqutsisoqarfimmi upalungaarsimanermut pisortaq Nikolas Hove oqarpoq.
Nerisassiaq igariaannaq qerisoq tassani pineqarpoq. Meqqi Normeat A/S atorlugu pisiniarfinni Kvickly, Super Brugsen, Dagli' Brugsen, Fakta aamma coop.dk-mi nioqqutigineqarpoq, tassanngaanniillu Brugsenimut ingerlateqqinneqarluni.
Nioqqutissap ullua
Taanna novembarip sisamaanni nioqqutissiarineqarpoq, Inuussutissanullu aqutsisoqarfiup atuisut ilaasa qerititsivianiissinnaasoq maluginiaqquaa.
Nioqqutissiaq qerititsivimmi angerlarsimaffimmiluunniit allami nassaarnigaanni iginneqassaaq, imaluunniit pisiniarfimmut pisiariffigisaanut utertinneqassalluni, aqutsisoqarfik ilisimatitsivoq.
Annertusineqarsinnaasoq
Misissuinerup ingerlanneqarnera pissutigalugu utertitsinerup ullunut arlalinnut kingusinnerusukkut annertusineqarnissaa Inuussutissanut aqutsisoqarfiup itigartitsissutigereernianngilaa.