assammik arsarneq
Mia Egede Rasmussenip unamminera tv-ikkut isiginnaarneqarsinnaassaaq
Mia Egede Rasmussen Lyngby HK peqatigalugu ullumi sisamanngornermi unammeqataassaaq
Mia Rasmussen aamma Lyngby HK timersoqatigiiffimmut TMS Ringstedimut unammilerpata Kanalsportenimi takuneqarsinnaassaaq toqqaannartumik.
Nunatta nalunaaqutaa naapertorlugu 15.20 unammineq aallartissaaq.
Mia Egede Rasmussen Lyngby HK-mut aasaq Ajax Københavnimit nuuppoq. Naak ukiup unammiffiusup aallartinnera sungiussassaagaluartoq unammeqataasarnini pitsanngoriartuinnavissoq oqaatigaa.
- Holditsinni nutaajorrappugut. Immitsinnut sungiunniarsareqqaarpugut, unammeqatigiittarnerpulli pitsanngoriartuinnavippoq. Uangali aamma unammeqataasarnikka pitsaanerusinnaasut isumaqarpunga. Aammali pitsanngoriartuinnavippoq, unamminitsinni kingullermi unammilluarnerpaatut toqqarneqarpunga, Mia Rasmussen Sermitsiaq.AG-mut oqarpoq.
Unammineq atatillugu Kræftens Bekæmpelsemut aningaasanik katersuiniartoqarpoq.