MF'it partiinit tamaneersut: Puisinniarneq tapersersorneqarli

- Danmarki pisortatigoortumik innuttaasuisalu kalaallit puisinniartarnerannik tapersersuinissaannik kaammattorneqarput.

Taama folketingimi ilaasortat partiinit tamaneersut ataatsimut nalunaaruteqarput.

- Nuannaarutigeqaara Folketingimut ilaasortat partiinit tamaneersut Nunatta puisinniarneranut tapersersuineq pillugu avammut oqaaseqaatitsinnut peqataajumammata. Assut iluarisimaarnarpoq puisinniarneq ataatsimoorfigisinnaagatsigu, taama Inuit Ataqatigiinneersoq Sara Olsvig avammut nalunaaruteqarnissamut suliarinnittuusoq oqarpoq.

- Puisinniarneq puisillu amiinik avammut tunisaqarsinnaaneq kulturitsinnut piniartortatsinnullu pingaaruteqarluinnarpoq. EU-mi nunarsuullu sinnerani nunatta puisit amiutai piujuaannartitsineq tunngavigalugu nioqqutassiaanerannik paasititsiniaanissaq pillugu maannakkut iliuuseqarnissaq pingaaruteqarluinnarpoq. Nunatta, Danmarkip EU-llu ataatsimoorlutik tamanna suliassaraat, Sara Olsvig itisiliivoq.

Ataatsimoorussamik oqaaseqaat
Folketingimi partiit politikkikkut sammiviit akimorlugit Kalaallit Nunaata puisinniartuuneranik tapersersuillutik nalunaartuteqarput ilaatigut ima allallutik:

- Ukiuni arlaqalersuni kalaallit puisit amiinik tunisaqartarnerat appariartorsimavoq. Tamanna unitsittariaqartoq Folketingimi partiit tamakkerlutik isumaqarput. Maanna Kalaallit Nunaanni piujuaannartitsineq tunngavigalugu puisinniartartuunera pitsaasumik sammineqarnissaa pillugu peqatigiillutik sulinialersimapput. Ukiorpanngortuni puisinniartarnermut akerliusut tapersersortissarsiortarneranni EU-llu puisit amiinik eqqusseqqusiunnaarnerani Kalaallit Nunaanni puisinniarnermik inuussutissarsiuteqarneq piujuartitsisumillu tunngaveqartumik avammut tunisassiorneq siunertarineqanngikkaluamik eqqorneqarsimapput.

- EU-p eqqusseqqusiunnaarnerani 'Inuit ilanngunneqannginnerannik' imaqarpoq, taamaanneranilu kalaallit puisit amiutaannik eqqussinissaq inerteqqutaanngilaq. Inerteqqummulli ilanngunneqarsimannginneq piviusoq isigalugu pitsaasumik sunniuteqarsimanngilaq.

- Taamaattumik EU-p innuttaanut pisisartunullu kalaallit puisit amiutaasa inerteqqutaannginnerannik erseqqissumik paasissutissiinissaq pisariaqartinneqarpoq. Ilaatigut WWF-i qanittukkut naqissusiivoq Kalaallit Nunaata puisinniartarnera piujuaannartitsisumik ilisimatusarnikkullu tunngaveqartumik siunnersuisarnikkut pisartoq.
Kalaallit Nunaata nunap pisuussutaanut piujuaannartitsinissamik tunngaveqartumik atuinissamut pisinnaatitaaffeqarnera tapersersorparput. Kalaallit Nunaata puisinniartarneranut puisillu amiinut tapersersuisuuvugut, taama kaammattuipput folketingimi ilaasortat ukuusut:

• Lone Loklindt (RV)
• Ellen Trane Nørby (V)
• Finn Sørensen (EL)
• Lisbeth Bech Poulsen (SF)
• Uffe Elbæk (Alternativet)
• Flemming Møller Mortensen (S)
• Karina Adsbøl (DF)
• Per Stig Møller (K)
• Villum Christensen (LA)
• Edmund Joensen (SP)
• Sjúrdur Skaale (JF)
• Sara Olsvig (IA)
• Doris Jakobsen (Siumut)