juullimi tunissutissat
Meerartavut nipilersuutinik tunissutisilersut
Nunatsinni meeqqat arlallit nipilersuutinik tunissutisinissaminnut qilanaaruteqarsinnaapput, nipilersuutit DR-ip katersortitai ilaatigut Kalaallit Illuutaanni Københavnimi
Danmarks Radiop Danmarkimi innuttaasut nipilersuutikuminnik atornikunik kalaallit meerartaannut tunissuteqarnissannut kajumissaarsimavai. Ilaatigullu Kalaallit Illuutaat Københavnimiittoq DR-ilu, atuarfiillu 45-t nipilersuutinik atornikunik tigooraasuusimapput.
Katersuiniarneq pivoq Danmarks Radiop Nunatsinnit juullimi inuulluqqussummik aallakaatitassiornissaanut atatillugu. DR-mi sulisut nunatsinnut aallakaatitasioriartulerunik nipilersuutit nassassavaat meeqqanullu agguaallugit.
Atuaruk: Katuamit juullimut inuulluaqqusineq ukioq manna aallakaatinneqassaaq
Katersuiniarnermullu DR-ip aallartissimasaanut atatillugu, Københavnimi Kalaallit Illuutaat nipilersuutinik atornikunik arlalinnik nuannaarlutik tunniussaqarusuttunit tigusaqarsimavoq.
- Blokfløjtit arlallit, trommit, tværfløjte ataaseq, nutsugiaq, trompetteq guitarillu tunniunneqarput. Aamma guitarip anua, Small Time Giantsimit erinarsortartumit atsiorneqarsimasoq tunniunneqarpoq. Nassiunnissaat qilanaaraagut, Søren Thalun, Kalaallit Illuutaanni tusagassiisartoq oqarpoq.
‘Kalaallit Nunaannit juullimi inuulluaqqussut’ DR1-kkut 21. december aallakaatinneqassaaq.