misissuineq nutaaq

Meerarpassuit piitsutut suli inuupput

Nunatsinni meeqqat piitsuullutik inuusut ikiliartunngitsut meeqqat inuusuttullu oqallittarfiata misissuisitsinerani erserpoq

Meeqqat piitsuullutik inuusut isumaginninnikkut ajornartorsiuteqalersarput

Piitsuussutsip meeqqat eqqortarpai imigassamik atornerluineq persuttaanerillu ulluinnarni nalaattagarineqartarlutik. Meeqqat 11,7 procentii piitsuullutik inuusut misissuinerup nutaap takutippaa. Kisitsisit meeqqat oqaaseqartartuat meeqqallu siunnersuisooqatigiit siulittaasuat ernumaammersippaat.

Misissuinermik suliaqartut tassaapput Statens Institut for Folkesundhed Nunatsinni naatsorsueqqissaartarfik suleqatigalugu meeqqat piitsuussusaannik misissuisut. Misissuineq 2007-mi misissuinerup malitsigaa taamanikkullu paasineqarpoq meerarpassuit piitsuullutik inuusut. Misissuinerup nutaap takutippaa ilorraap tungaanut ingerlasoqanngitsoq.

Imminut toqunneq atornerluinerlu
- Assut ilungersuanarpoq meeqqat inuusuttullu taamak amerlatigisut piitsuullutik alliartormata, aamma assut aarlerinassutaavoq piitsuuneq kingornunneqartarmat, meeqqallu taamaalillutik inersimasunngoreerlutik suli piitsuullutik inuusinnaammata, meeqqat oqaaseqartartuat meeqqallu siunnersuisooqatigiivisa siulittaasuat Aaja Chemnitz Larsen oqarpoq.

Piitsuulluni inuunermi isumaginninnikkut ajornartorsiutinik siumugaqarnissaq qaninnerusartoq oqaatigineqarpoq.

- Inuusuttut piitsunik ilaqutallit amerlanerit imminoriarsimasuupput, atuarfimmi angusamikkut imminnut pitsaanngitsumik angusaqarsimasutut nalilertarput, naamaarsimasartuupput, angajoqqaaqarput imerajuttunik, anaanamillu unatagaasarneranik misigitinneqartartuullutik – assersuutit ilaannaat taassagaanni, meeqqat inuusuttullu oqallittarfiat MIO nalunaarpoq.

Piitsuullutik inuusut tassaakkajunnerupput angajoqqaat kisermaat, inoqutigiinnit amerlasuuneersut nunaqarfimmiullu. Tamannalu 2007-mili ilisimaneqarpoq.

- Politikerinut akisussaffeqartuusunut naammagisimaarutaanavianngilaq sunnguamilluuunniit pitsanngoriartoqarsimanngimmat. Ilisimagutsigu kikkut iliuuseqarfigalugit sullitarissanerlutigit, ilisimanninneq tunngavigalugu tamaviaarluta sulisinnaasariaqarpugut, Aaja Chemnitz Larsen oqarpoq.

Linki talerpiatungaaniittoq toorlugu nalunaarut naalisagaq aasinnaavat.

Powered by Labrador CMS