Sunday, October 15, 2017 - 07:53

Meeraq ulluni 165-ni videokkut apersorneqarnissaminut utaqqisariaqarsimasoq

Assi.: Anders Brohus/POLFOTO/Arkiv MODELBILLEDE
Meeqqat, kinguaassiutitigut kanngunarsagaasimasut, politiinit videokkut apersorneqarnissaminnut ulluni 165-ini utaqqisinnaasarput. Tamanna meeqqap Nuummiup misigaa. Politiit iluminni maleruaqqusaanni allassimavoq ullut arfineq marluk qaangiunnerini videokkut apersuineq ingerlanneqarsimassasoq.

Ukioq manna kanngutsaatsuliorfigineqarsimanermut atatillugu meeqqat 90-it politiinit videokkut apersorneqarsimapput. Kalaallit Nunaanni Politiit suliat amerlanerujussuat pissutigalugit meeqqanik kinguaassiutitigut kanngutsaatsuliorsimanerit nalunaarutigineqarneraniit ullut arfineq-marluk qaangiutsinnagit videokkut apersorneqarnissaannut piffissaliussaq eqquutsissinnaanngilaat.

Ullut 165-it qaangiunnerini apersuineq

Nuummi suliami niviarsiaraq qulinik ukiullip videokkut apersorneqarnissaanut ullut 165-it ingerlasimasut, Politiken sapaammi allappoq. Anaanaasoq naapertorlugu angajoqqaat panitsik tarnip pissusaanik ilisimasalimmut oqaloqateqartikkusussimangaluarpaat, tamannalu politiinit innersuussutigineqarsimanngilaq, taakku pisup eqqartorneqarnissaa kissaatigisimanngilaat, qanormi pisoqarsimaneranik allatut tassunga isummertitsisinnaammat.

Unnerluussisussaatitaasut pisortaat Morten Nielsen, Kalaallit Nunaanni Politiininngaanneersoq uppernarsaavoq, meeraq kanngutsaatsuliornermik oqaloqatigineqarnissaa politiinit kissaatigineqanngitsoq.

- Kisianni meeraq pineqartillugu pingaarnerpaajuassaaq, unnerluussisussaatitaasut pisortaat Politikenimut oqarpoq.

Kingunerluutit ilungersunartut

Utaqqineq sivitsorpallaarpat meeqqamut kingunerlutsitserujussuarsinnaavoq, anniaammi sivitsorneqartarpoq, toqqissisimaneq sunnerneqartarluni meerarlu ineriartornerlussinnaalluni, Red Barnetimi siulittaasoq, Jonna Ketwa Politikenimut oqarpoq.

Unnerluussisussaatitaasut pisortaat Morten Nielsenip naqissuserpaa, utaqqinerup sivikillineqarnissaa sulissutigineqartoq, ingerlaannarmi nassuiaaneq piffissap sivisuup ingerlareernerani nassuiaateqarnermiit pitsaanerusarmat.

Kalaallit Nunaanni videokkut apersuinerit amerlassusaat Danmarkimiit amerlanerujussuupput. Ukioq kingulleq Danmarkimi politiit 822-eriarlutik videokkut apersuisimapput. Ukioq mannalu maannamut Kalaallit Nunaanni 90-eriarluni videokkut apersuisoqarsimavoq.

Læs også

Seneste nyheder / Nutaarsiassat kingulliit