Friday, July 14, 2017 - 08:08

- Meeraaninniilli pilluarneq aatsaat misigeqqippara

Assi.: Polfoto/modelfoto
Inersimasut meeraanerminni kinguaassiutitigut atornerlunneqarsimasut kingunerlutsitsisut ikiorneqaruni pitsaanerusumik inuuneqalersinnaapput. Angalaaqatigiittartunit misilittakkat tamanna takutippaat, taakku 2013-imiilli katsorsaasarput.

Inuit meeraanerminni kinguaassiutitigut katsorsarneqarunni aniguinermit inuuleqqissinnaapput.

Inersimasunut kingunerlutsitsisunut angalaqatigiittartunit misilittakkat tamanna takutippaa.

Meeraaninni kinguaassiutitigut atornerlunneqarninnit kingunerlutsitsinerma suliarinerata kinguneraa, inuuninni siullermeerlunga nammineq naleqassusera, tatiginera, aamma ilukkut nuannaarneq ilumoortoq misigaara. Inuuleqqittutut misiginera uterpoq, aniguisuujunnaarpunga, katsorsartissimasut ilaat oqarpoq.

Allat malugalugit imminut maluginngitsut
Angalaqatigiittartut 2013-imili inuit 500-t missaanniittut katsorsarsimavaat. Katsorsaanerit naammassineqarnerisa kingorna psykologit illoqarfiit pingasut tikeraaqqippaat, ataatsimullu isigalugu tamarmik pitsaanerusumik inuuneqalersimanerat tikeraaqqinnerup takussutissartaraa.

- Tarnera timigalu ataqatigiinnerulerput. Kamarujussuartarnikka ilukkullu stressertarnera peeruppoq, taakku ilaat ukioq ataaseq qaangiuttoq psykologinit tikeraarneqarami oqarpoq.

Naja Lyberth angalaqatigiittartunit psykologit ilagaat. Inersimasut kingunerlutitsisut inuit allat sakkortuumik malugisaramikkit imminut malugisinnaanertik annaasaaraat, taassuma nassuiarpaa. 

Piniarnermik kultureqarluni inuuniarnermut pisariaqartumi ataatsimoorussilluni perorsaasarnermik ileqqoqarnermit tamanna sakkortusineqartarpoq.

Inersimasut kingunerlutitsitsisut allat iluaalliutaat malugillaqqittorujussuaat, imminullu tutsipajaartarlugit, psykologi nassuiaavoq.

- Nammineq pisariaqartitakka pinnagit allat pisariaqartitaat isumaginiarlugit siullermik imminut puigorajuttarpunga, ataaseq oqarpoq.

Kisianni katsorsartinnerup kingorna allanngorpoq.

- Soorlu imminut nassaarilluni, allat qitiutinnagit imminut qitiutilluni.

Alla ima oqarpoq:

- Siullermik allat nuannaartinniaannarlugit imminut puigortarsimallunga maanna imminut malugisinnaavunga.

Nammineq angerlarsimaffimmi pinngitsaalineqarnissamut ersineq
Katsorsarneqartut killiliinissamut pikkorinnerulersimasut, psykologit malitseqartitsillutik nalunaarusiaanni ataatsimut isigalugu inerniliunneqarpoq.

- Maanna killissakka aamma imminut malugisinnaavakka, allallu maluginissaa pingaarnerutikkunnaarsimallugu. Tamanna oqiliallannarlunilu nukissaqarnarpoq.

Kinguaassiutitigut atornerlunneqarnerup killiliisinnaanermut maluginiutit aserortarai, Naja Lyberthip nassuiarpaa. Assiliartalersorlugu oqaluttuarissagaanni illumi iikkat putoorneqarneranut assersuussinnaavoq, taamaalilluni nammineq toqqissisimaffissaagaluaq iserfigineqariaannanngortarpoq, tunngaviusumillu isumannaassusermik toqqissisimanermillu misigissuseq annerusumik minnerusumilluunniit navianartorsiortutut misigisimanartarpoq.

Arlaqartunullu illu ulorianartoq piviusoorpalaartutut misigisimanarsinnaavoq.

- Katsorsartileqqaarama illumi kisimiillunga sinissinnaanngilanga, arlaata igalaakkut iserluni pinngitsaalissagaanga ersigisarpara. Ullumikkut tamakku eqqarsaatigineq ajuuippakka, arnaq inuusuttoq oqarpoq, taannalu tamaatut ersiortarsimasuni kisimiinngilaq.

Imminut nassaarisartut
Katsorsartinnerup kingorna amerlasuut 'namminiusinnaalerneq' misigisarpaat, nalunaarusiap ilaani inerniliunneqarpoq.

- Namminermit allat immikkoortinnerinut pikkorissisorujussuupput. 'Namminiunermik' misigisimanivimmik pissarsipput, Naja Lyberth oqarpoq.

- Allaanngilaq igalaaminermik ersinngitsumik asseqqaneqarluni. Maanna pinngitsaaliisuma pinngitsaaleqqissinnaajunnaarpaanga, angut 40-t sinnerlugit ukiulik oqarpoq. 

Ukiap ingerlanerani isumanginninnermut naalakkersuisoqarfik angalaqatigiittartunit maannamut misilittagarineqalersimasut nalilerneqarnerannik suliaqarniarpoq.

- Inuunerup nuannersortai nuanniitsortaalu qujamasuutigeqaakka. Aali siullermik imminut toqunniaraluartunga, arnaq utoqqasaanngulersoq inerniliivoq.

- Meeraaninnit ilukkut pilluarneq siullermeerlunga aatsaat misigeqqippara, arnaq 30-t sinnerlugit ukiulik oqarpoq.

Kingunerlutsitsillutit katsorsarneqarsimaguit, misilittakkatillu oqaluttuarerusukkukkit, taava uunga attaveqarfigitigut walter@sermitsiaq.ag.

Seneste nyheder / Nutaarsiassat kingulliit