meeqqeriviit

Meeqqerivinni inissanik amigaatillit amerlapput

Angajoqqaanngorlaat erninermut atatillugu sulinngiffeqareernermi kingornagut meeqqaminnik meeraaqqeriviliaassisinnaanissaat oqinnerulersinniarlugu iliuuseqartoqarnialerpoq

Antallet af vuggestuepladser i hovedstaden er langt fra nok til at dække behovet.

Demokraatineersup Randi Vestergaard Evaldsen angajoqqaanik nalunngisaqarluni oqarpoq, angajoqqaanngorlaat sulileqqilersut ilisimatinneqarsimasut, qitornaat utaqqisuni normu 70-imiittoq.

- Ullumikkut ajoraluartumik imaappoq, meeraq meeraaqqerivimmi inissamut allatsinneqarsinnaavoq aatsaat pingasunik qaammateqaleraangat. Imaappoq, pilersaarusiortoqarsinnaanngilaq allamilluunniit paaqqinniffissarsiuussisoqarsinnaanngilaq. Tamatuma kingunerisaanik sulileqqinnissaq artornartarpoq toqqissisimanaranilu, kommunalbestyrelsemi ilaasortaq Demokraatineersoq oqarpoq.

Taamaammat kommunalbestyrelsip ataatsimiinnissaanut siunnersuuteqarpoq. Ataatsimiinneq februaarip 20-ani pissaaq.

Sulinngiffeqarnissaagaluit
- Isumaqarpugut, siusinnerujussuakkut meeraq meeqqerivimmi inissamut allatsissinnaasariaqartoq. Taamaasilluta qulakkeersinnaavarput, angajoqqaat aammalumi kommune pilersaarusiornissaminnut piffissaqarnerulaarnissaat. Aamma osumaqarpugut, naartunermi qaammatit arfinilinngorsimagaanni, taava nalorninarunnaartarpoq meeraaqqerivimmi inissamik pisariaqartitsinissaq, taamaattumillu piffissami tassani meeraq meeraaqqerivimmut inissamik allatsissinnaasariaqarpoq, Randi Vestergaard Evaldsen oqarpoq.

Tamatuma saniatigut pingaaruteqartutut isigaa, Kommuneqarfik Sermersooq angajoqqaanut sukkanerusumik akissuteqartalissasoq, illuatungeriit pilersaarusiorluarnerunissaat anguniarlugu.

Iluarsiisoqartariaqartoq
- Demokraatit isumaqarput, naleqquttuussasoq, erninermut atatillugu sulinngiffeqarallarnerup naannginnerani kingusinnerpaamik qaammat ataaseq sioqqullugu qaqugu inissaqalissanersoq kommune akissuteqartariaqartoq. Itigartitsissuteqartoqarpat, angajoqqaat aamma nalunaarfigineqassapput, qaqugu inissaqalissanersoq naatsorsuutigissaneraat.

- Taamaalilluta qulakkiissavarput angajoqqaat sulisitsisortik peqatigalugu pilersaarusiorsinnaalernissaat. Ullumikkut imaappoq, angajoqqaat ajoraluartumik nalunaarfigineqartarput meeqqamik paarineqarnissaat namminneq akisussaaffigissagaat, amerlasuutigullu angerlarsimaffimmi paarsisartunut kommunip avataaniittunut paarsisussarsioqquneqartarput. Tamanna naammaginanngilaq, Randi Vestergaard Evaldsen oqarpoq.

Meeqqerivimmiititaqartarneq pillugu siunnersuut aalajangiiffigineqassasoq kommunimi pisortaanerup Lars Møller-Sørensenip ilisimatitsissutigaa.

Powered by Labrador CMS