Meeqqat takornarianut illersorneqartut
Ilulissani angajoqqaat takornariat digitalimik assiliisarnerat qatsuppaat, takornariammi illoqarfimmi meeqqerivinni assiliisaqaat.
»Don’t take a picture.«
»Assiliinak.« Ilulissani meeqqeriviup Angajop ungaluugaani allagartatigut nalunaarut taama ersaritsigaaq.
Nammineerluni allagartaliani assiliiviup titakkap takuneqarsinnaasup takutippaa meeqqerivimmi sulisut takornariat nunatsinni meerartatsinnik assiliisarnerat qatsukkaat.
Takornarialli meeqqerivik pinnguartarfillu assilisinnaavaat, kisianni meeqqanik tassaniittoqartinnagu.
Allagartat ullut 14-it matuma siornata missaani nivinngartorneqartut pisortap tullia Johanne Olsvig oqarpoq.
– Takornariat meeqqanik assileerusuttut ingasangineqalerput. Takornariat amerlanerpaat akuerineqaqqaaratik meeqqanik assiliisarput, taamaattumik angajoqqaat uagullu perorsaasuusugut tamanna toqqissimanartinngilarput, Johanne Olsvig Sermitsiamut oqarpoq.
Angajoqqaat ilaasa allagartaliinissaq isumassarsiaraat. Johanne Olsvigip paasissutissiissutigaa, meeqqerivimmi aqutsisut kommunimi perorsaanermut siunnersortimit akuerineqareermata aatsaat allagartat nivinngarneqartut.