Inatsisartut
Meeqqat sumiginnakkat siusissukkut iliuuseqarfigineqartarnissaat IA-mit kissaatigineqarpoq
Meeqqat sumiginnakkat, kinguaasiutitigullu innarlerneqarsimasut siusissukkut piukkunnaateqartumillu katsorsarneqartalernissaannik neqerooruteqarnissaq, allatigullu ikorfartuisinnaaneq inuiaqatigiit qanoq ililluniqulakkeerneqarsinnaanera pillugu apeqquteqaat aallaavigalugu oqallisissiaq, marlunngornermi Inatsisartuni oqallisigineqassaaq
Inuit Ataqatigiit meeqqat sumiginnagaasimasut, kinguaassiutitigulli atornerlugaasimasut katsorsarneqartarnerat siusinnerusukkut pisalernissaa sulissutigaat.
Taamaammat partiip Inatsisartuni ilaasortaatitaasa meeqqanut sumiginnaasimasunut, taamatullu kinguaasiutitigut innarlerneqarsimasunut siusissukkut piukkunnaateqartumillu katsorsaanissanut neqerooruteqarnissaq, allatigullu ikorfartuisinnaaneq qulakkeerneqarnissaa pillugu oqallisissiamik siunnersuuteqarput.
Siusissukkut iliuuseqarneq
- Meeqqanik sumiginnaaneqartunik imaluunniit atornerlunneqarnermik innarlerneqarnernillu misigisimasaqartunik katsorsarneqarnissaat siusissumik iliuuseqarnertut isigisariaqarput, taamatullu taamaaliornikkut nukissanik tunniussinertut meeqqat pineqartut nuannersumik inuuneqarnissaminnut tunngavissinneqarsinnaallutik, partii allappoq.
Meeqqat kinguaassiutitigut kanngutsaatsuliorfigitinnermik misigisaqarsimasut sumiginnaasimasullu katsorsarneqarnissaannut neqeroorutit amerlanerusariaqaraluartut, IA-p Inatsisartuni ilaasortaatitai isumaqarput.
- Periarfissaasinnaasoq tassaavoq katsorsaasunik sinerissami angalaarsinnaasunik pilersitsinissaq, ilaatigullu tassaasinnaallutik tarnip nakorsai meeqqanut innarlerneqarsimasunut katsorsaanissanik neqerooruteqarsinnaasut. Inuiaqataanitsinni kingornussatta kipinissaat kissaatigigutsigu meerartavut tunniussivigisariaqarpavut, meeqqanut kinguaariinnullu tullinnguuttunut iliuuseqarnissatsinnik salliutitsinissarput ernumanata salliutittariaqarlugu. Meeraq angajoqqaaminit nukissaqarneruppat ima kinguneqarsinnaavoq meeraq angajoqqaaminut uterusunngitsoq, Inuit Ataqatigiit Inatsisartuni ilaasortaatitai oqarput.
Oqallinneq ullumi marlunngornermi Inatsisartuni pissaaq.