Thursday, January 11, 2018 - 15:00

Meeqqat qamuteqaralattarnerat politiinit iliuuseqarfigineqarpoq

Assi.: Leiff Josefsen
Sisimiuni politiit arlaleriarlutik paasitinneqarput ukiukitsut qamuteralannik ingerlatsisimasut. Tamanna pissutaalluni nakkutilliisoqartalissaaq

Qamuteralannik ingerlatsineq pillugu Sisimiuni politiit erseqqissaateqarput.

- Qamuteralaat atorneqarnerini ukiut tamaasa navialinernik ajutoornernillu pisoqartuaannarpoq, ilaatigut ajoraluartumik inunnik annertuumik ajoqusertoqartarluni imaluunniit toqumik kinguneqarsinnaasarluni. Taamaattumik angallannerup isumannaatsuunissaa anguniarlugu aqqusinertigut angallannermut inatsimmi angallannermut maleruagassat nalinginnaasut eqquutsinnissaannut peqqutissaqarluarpoq, politiit tusagassiuutinut nalunaaruteqarput.

Eqqaamasassat

Qamuteralaat pillugit politiit ima erseqqissaateqarput.

  • Sillimmasiineq: Pinngitsoorani sillimmasiisoqarsimasariaqarpoq. Sillimmasiinermut allagartaq, imaluunniit sillimmasiinermut akilersuinermut uppernarsaat, nalunaarsuinermi takutinneqarsinnaajuaannassaaq. Akilersuinermut uppernarsaat angalaarnermi nassarneqassaaq.
  • Nummerpladet: Qamuteralak atorneqannginnermini nalunaarsorneqassaaq. Nalunaarsuinermut atatillugu qamuteralak politiinit akuerisassanngortillugu saqqummiunneqassaaq. Qamuteralammut nummerplade tassaavoq nalunaarsuinermi nalunaaqqummik taaneqartartoq.
  • Ukiut: Qamuteralammik aquttoq 18-inik ukioqalereersimassaaq – politiit allanut immikkut ittumik akuersisimanngippata.
  • Ilaasut: Qamuteralammut ilaasinnaasut sipporlugit ilaasoqaqqusaanngilaq.
  • Niaquarnaveeqqut: Angalanermi aquttoq ilaasorlu, 15-ileereersimasoq, niaquarnaveeqquteqassapput. Aammattaaq ilaasut tallimaleereersimasut, 15-iliisimanngitsulli, niaquarnaveeqquteqarnissaat misissussallugu aquttup akisussaaffigaa.

Kinguneqartitsinerit

Eqqaamassallugu pingaaruteqarpoq aqqusinertigut angallannermut inatsit sumiiffinnut tamanut, angallatit assigiinngitsut arlallit angallatigalugit angallannermut nalinginnaasumut atorneqartunut, atuuppoq. Aammattaaq aqqusinertigut angallannermut inatsit illoqarfiup avataani, illoqarfiup nunaqarfiullu akornanni sumiiffinnilu allani, angallannermut atorneqartunut, qamuteralannut illiniuunneqarsimasunut atuuppoq.

Siuliini allassimasunik maleruagassanik unioqqutitsineq akiligassiinermik imaluunniit pinerluttulerinermik inatsimmi aalajangersakkat malillugit arsaarinninnermik kinguneqarsinnaavoq.

Seneste nyheder / Nutaarsiassat kingulliit