meeqqanit kajumissaarut
Meeqqat pujortassanngillat
Inersimasunut pikitsitsineq: Meeqqat pujortartassanngillat.
Pujortartarneq pillugu innuttaasunik ataatsimiititsineq aamma pujortartarnermut aqqusinermi akerliussutsimik takutitsinerat pujortartarnermut pitsaaliuineq pitsaanerpaavoq.
Peqqissutsimut naalakkersuisoq, Agathe Fontain taama isumaqarpoq, tamanna tunngavigalugu Qaqortumi Tasersuup Atuarfiani atuartut ukiumi Klassi Pujortarfiunngitsumi ajugaatippai. Ajugaasut 30.000 koruuninik pissarsipput.
Atuartut klassiat ukiormanna Klassi Pujortarfiunngitsumut unammisitsinermut peqataapput, tassani tupa pillugu oqaloqatigiinnermik pilersitsinissamik siunertaavoq. Tamannalu Qaqortumi meeqqat iluatsippaat.
- Atuartut suliassamik suliarinninnerminni periusaat pikkugeqaara. Klassit ajugaatinneqartut marluk suliassartik suliarigamikku najukkaminni innuttaasut peqataatissimavaat. Taakkua sammisat pingaarutillit sammisimavaat tassalu meeqqat akornanni pujortartarneq, pujortarfigineqartarneq meeqqallu pujortartannginnissaannut tupamillu pissarsisinnaannginnissaannut inersimasut akisussaasuunerat ilanngussimallugu, Peqqissutsimut Naalakkersuisoq Agathe Fontain, Peqqik.gl-imi nutaarsiassami oqarpoq.
Nanortalimmi Nanortallip Atuarfiani 7.a., normu 2-tut toqqarneqarput. Klassip qaarmassaanerani angajoqqaat akisussaanerat ukkatarineqarpoq. Atuartut oqaluttualiorsimapput nammineerlutik allallutillu titartaasimallutik.
Unammisitsinermut klassit katillugu 12-it peqataapput.