nalunaarsorneqanngitsut:
Meeqqat puigukkat
Meeqqat pisortanit sumiginnarneqartarnerannik ajornartorsiut ilimagisamit annertuneruvoq. Tassa meeqqat ulorianartorsiortut pisortanit maluginiarneqanngitsut. Meeqqat illersuisuat taama naliliivoq
Nuummi inunnik isumaginninnermut aqutsisoqarfik meeqqanik navianartorsiortunik kisimi sumiginnaanngilaq.
Isumaginninnermut naalakkersuisup Sara Olsvigip (IA), nakkutilliinermut ingerlatsiviup illoqarfiit tikeraagaannit 18-iusunit 15-t, meeqqanut suliat pitsaasumik ingerlatinngikkai uani sapaatip-akunnerani oqaluttuaraa.
Meeqqat nalunaarsorneqanngitsut
Kisitsisillu taakku oqamisaarutigineqarnerinit ajornartorsiut suli annertuneruvoq. Tassami meeqqat navianartorsiortut pisortat suliassaanni ilaanngillat.
Meeqqanut illersuisoqarfimmi MIO-mi tamanna misilittagaqarfigineqarpoq.
- Meeqqanit ikiortariaqaraluartunit ikiorneqanngitsunit saaffigineqakkajuttarpugut, taakku isumaginninnermut aqutsisoqarfimmi 'suliaannginnamik' ikiorneqanngillat, meeqqat illersuisuat Aviâja Egede Lynge Sermitsiaq.AG-mut oqarpoq.
- Tamanna ernumanartoqartippara.
Imminut toqoriartut
Assersuutigalugu angajoqqaat isumaginninnikkut ikiorneqarnissamik noqqaasimanngitsillugit, meeqqat nalunaarsorneqarsimanngitsut Aviâja Egede Lyngep oqaluuserai.
Assersuutigalugu nammineerusussinnaasarput. Tamannali meeqqat ajornartorsiutinik oqimaatsorujussuarnik nammataqannginnerannik isumaqanngilaq.
- Meeqqanit imminut toqunnissamik eqqarsaateqartunit kisimiillutik aqqusinermi angalaartunit imaluunnit imminut toqoriarnikuusimasunit saaffigineqartarpugut, taakkulu ikiorneqarnikuunngillat, taanna oqarpoq.
Atornerlugaasimasut meeraat
Angerlarsimaffinni aamma pisortanit ikiorserneqanngitsuni imigassamik atornerluineq takussaasarpoq. Meeqqat ernguttunik misigisaqakulatillugit, ingammik timikkut imaluunniit nakuusernermut attuumassuteqaraangata ikiortariaqartarput.
- Meeqqat kinguaassiutitigut atornerlunneqarnermit kingunerlutsitsisunik angajoqqaallit assersuutit allaapput, Aviâja Egede Lynge oqarpoq.
Taakku meqqat angajoqqaamisut takussutissanik peqarsinnaasaarput, soorlu killiliisinnaanatik.
- Tamarmik pisortat kisitsisaataanniinngillat, kisianni assinganik ikiorneqarnissamik pisariaqartitsipput, meeqqat illersuisuat oqarpoq.
Tamanna tunuliaqutigalugu kommunit pitsaaliuinermik sulinertik aamma ujartuilluni nakkutilliinerup nukittorsarneqarnissaanut kaammattuivoq, taamatullu aamma soorlu inatsit nutaaq meeqqanut tapersiisoq kajumissaarisoq.