Meeqqat pisinnaatitaaffitik mobilikkut ilinniarsinnaagaat

MIO-p sapaatip akunnerani matumani meeqqat pisinnaatitaaffii app-i atorlugu meeqqat iPad-itik smartphonetillu atorlugit pisinnaatitaaffitik nuannersumik ajornaatsumillu ilinniarsinnaassavaat.

Meeqqat Illersuisuata Aaja Chemnitz Larsenip meeqqat pisinnaatitaaffitik pillugit atortorissaarutit namminneerlutik nuannarisatik atorlugit paasissutissanik ujarlersinnaanissaminnut periarfissaqarnerat nuannaarutigaa.

- Kommunit arlallit meeqqat atuarfianni meeqqerivinnilu atugassanik iPad-inik agguaanerannut atatillugu meeqqat pisinnaatitaaffii pillugit app-iliornissaq isumassarsiaraarput. Ajoraluartumik appit kalaallisut amerlanngillat, taamaattumillu isumaqarpugut, meeqqat pisinnaatitaaffii pillugit app-i atuartitsinermi atorneqarsinnaasoq, soorlu assersuutigalugu inuttut ineriartornermi, sanassallugu isumassarsiatsialaasoq, Aaja Chemnitz Larsen oqarpoq.

Kalaallisut danskisullu
App-i kalaallisuujullunilu danskisuujuvoq, taassumallu imaasa ilagaat Naalagaaffiit Peqatigiit Meeqqat Pisinnaatitaaffii pillugit Isumaqatigiissutaat meeqqanut naleqqussagaq, tassanilu meeqqat nunatsinni nunanilu allani sumi ikiortissarsiorsinnaanerlutik takusinnaavaat, pisinnaatitaaffitik unioqqutinneqarpata imaluunniit ikiorneqarnissaminnik pisariaqartitsigunik.

Assersuutigineqarsinnaavoq, meeqqat qanoq isillutik MIO-p SMS-ikkut siunnersuisarfia 1899 attavigisinnaagaat.

MIO neriuppoq, app-i meeqqanit inersimasunillu atorluarneqarumaartoq. Atuarfiit MIO-mit allaffigineqarsimapput meeqqallu app-ip internetikkut aanissaa pillugu atuartitsinermilu atorneqarnissaa pillugu ilitseqqullugit.

App-i iPhone-nik Android-inillu atuisunit atorneqarsinnaavoq. Ipad-imut aamma 'iPhone-muinnaq' qulerpiaaniittoq saamerleq toorlugu internet-ikkut aaneqarsinnaavoq.