Nuuk
Meeqqat pisinnaatitaaffiinik pikkorissartut
Ilinniartitsisut 25-t NAKUUSA-p meeqqat pisinnaatitaaffii pillugit isumasioqatigiissitsineranut sapaatip-akunnerata naanerani peqataapput
NAKUUSA nuna tamakkerlugu paasisitsiniaanerit aqqutigalugit 2011-miilli saqqumilaalersimasoq meeqqat pisinnaatitaaffiinik ilisimasat siammarterniarlugit atuarfinnut ataasiakkaanut maanna alloriarpoq.
Pisinnaatitaaffiit pillugit ilisimasat
NAKUUSA-p suliniutaani nutaami 'Uagut ulluinnarput - Uagut niperput', atuartut pisinnaatitaaffimminnik ilisimasaqarnerulersinnissaannik kiisalu meeqqat inuusuttuaqqallu pissutsini taakkununnga tunngasuni akuutinneqartarnissaanik qulakkeerinninnissamik siunertaqartumi ilinniartitsisut nunatsinnilu kommunit sisamat suleqatissatut pingaarnerpaapput.
Pingaartumik ilinniartitsisut suliniutip iluatsilluarnissaanut aalajangiisuupput. Taamaattumik ilinniartitsisut Nuummi sapaatip-akunnerata naanerani pikkorissaaneq aqqutigalugu suliniummut atatillugu pisinnaatitaaffiit pillugit ilinniartitsisuunissamut piginnaanngorsarneqartussaapput.
Kipiluttunartorsiorneq
- Nunatsinni ilinniartitsisorpassuit sulilluarput, atuartitsinerminni meeqqat pisinnaatitaaffi pillugit paasissutissanik ilanngussuisarlutik. Tamatuma peqatigisaanik meeqqat pisinnaatitaaffiisa qanorpiaq paasisaqarnerannik kipiluttunartorsiorneq ilaatigooriarluta aamma misigisarparput - aamma ilinniartitsisut akornanni. Meeqqat pisinnaatitaaffii akisussaaffiilu assersuutigalugu qanoq ataqatigiippat? NAKUUSA-mi suliniutinut aqutsisoq Najaaraq Møller oqaluttuarpoq.
Oqaaseqartartoq
Suliniut 'Uagut ulluinnarput - Uagut niperput' ilaatigut nunatsinni atuarfiit 84-iusut mikinersaanniit kommunini sisamani kommunalbestyrelsinut - paarlattuanillu - meeqqat sinnerlugit oqaaseqartartumik pilersitsinissamik siunertaqarpoq.
- Meeqqat inuusuttuaqqallu akornanni inuiaqatigiinni oqallinnermut peqataanerup iluaqutaaneranik kulturimik pilersitsinissaq anguniagaraarput. Kisianni aamma kommunit meeqqanut inuusuttuaqqanullu tunngasuni aalajangiisussanngortillugit kommunit taakkununnga tusarnaartarnissaannik kaammattorniarlugit ikiorniarlugillu. Meeqqat suliniut aqqutigalugu sunniuteqalersinneqassapput FN-ip meeqqanut isumaqatigiissutaa naapertorlugu pisinnaatitaaffigisaminnik, kisianni Kalaallit Nunaanni inuiaqatigiit meeqqanik inuusuttuaqqanillu inuiaqatigiinni oqallinnermut peqataanermik ilinniarsimasunik siunissami aamma iluaqutiginnissinnaalissasut neriuutaavoq, Najaaraq Møller itisiliivoq.
Siulliit
Ilinniartitsisut 25-t illoqarfinnit nunaqarfinnillu 16-init aggersuupput tassaallutillu ilinniartitsisut siulliit, NAKUUSA-p suliniummi suleqatigisassai. Kommuneqarfik Sermersuumi, Kommune Kujallermi aamma Qaasuitsup Kommuniani atuarfiit sinneri suliniummut peqataanissamut 2016-imi aamma qaaqquneqarumaarput. Ilinniartitsisut illoqarfigisaminnut nunaqarfigisaminnullu uterunik ilaatigut suliassarissavaat pisinnaatitaaffiit pillugit siunnersuisoqatigiinnik atuarfimmi atuartunik angajullernik inuttaqartussanik inissitsiterinissaq. Ilinniartitsisut isumasioqatigiinnermut peqataasut NAKUUSA-p saniatigut Ilinniartitaanermut, Kultureqarnermut, Ilisimatusarnermut Ilageeqarnermullu naalakkersuisoq Nivi Olsen, aamma meeqqat illersuisuat Aviâja Lynge, MIO-meersoq, naapissavaat.
UNICEF
NAKUUSA tassaavoq UNICEF Danmarkip aamma Naalakkersuisut akornanni suleqatigiiffik. Suliniut atuartitsinermi atortussanut nunalu tamakkerlugu paasisitsiniaanernut soorlu "Suli Anaanamik, suli Ataatamik", "Qaamanerup qinngoqqavaatit" kingullermullu "Yes! Pisinnaatitaaffiit nukiupput"-mut tunuliaqutaavoq.
Aamma atuakkit: Meeqqat aamma NAKUUSA nipilioqqipput
Nakuusamut nalunaarusiaq atuartunut saqqummiunneqassaaq
Nakuusa siunnersuutinik nassiussuivoq