Meeqqat pinngitsaalillugit nuutitat pillugit isiginnaagassiaq

Oqaluttuaq kikkunnit tamanit nalunnginneqalersimavoq. Meeqqat 22-it 1952-imi Danmarkimut nuutsinneqartut. Taakku ilinniartinneqarniarsimapput Nunatsinnilu pikkorilluinnarlutik siuttussatut toqqagaasimallutik.

Misileraanerlu naluneqanngitsutut meeqqanut alianarluinarlumik kingunerlutitsirujussuarsimavoq.

Eqimattap P.R.A.A.K.-p pinngitsaaliilluni nuutitsisimaneq aallaavigalugu isiginnaangassiorsimapput.

- Taakku meeqqat kalaallit toqqaannartumik oqaluttuarinngilagut, taamaattoq kinaassuseq, avissaarneq, immikkoortitaaneq naggueqannginnerlugu qulequtarisimavagut, eqimattap isiginnaarutissiaq pillugu oqarput, taakku isiginnaangassiaq atsersimavaat 'Inuit'.

Nunarsuatsinni ukiuni makkunani pisut pingaarnerit aallaavigalugit immikkut qulequtaraagut.

'Inuit' juunip ulluisa aallaqqaataani aappaanilu Teaterøenimi Københavnimiittumi takuniarneqarsinnaavoq.

Isiginnaagassiaq isiginnaartitsinermik, qitinnermik taallanillu imaqarpoq.

- Misigissutsit kamak, maqaasineq, kiserliorneq inuup nagguimminik peersinneqarnerani kinaassusiiangaanerminilu aqqusaartagai immikkut sammissavagut, 'Inuit' pillugu P.R.A.A.K. allappoq.

Isiginnaagassiaq ukioq kingulleq septembarip qaammataani Århusimi takutinneqarpoq. Helene Thiesen, meeqqat pinngitsaalisaallutik nuutinneqarsimasut ilaat nammineq misigisani pillugit oqaluttuarsimasoq, isiginnaangassiap takuteqqaarneqarnerani peqataavoq.

Helene Thiesen atuagaq 'For flid og god opførsel' atuakkiarisimavaa.

Allaaserisap ataani isiginnaagassiamit tigulaagaq takusinnaavat: