Meeqqat pillugit siunnersuut MIO-mit tapersersorneqarpoq

Inatsisissatut siunnersuut nutaaq Naalakkersuisut ilimasaarutigeqqammisaat qitiusumilu oqartussaaffiup kommunit isumaginninnermut allattoqarfiinut akuliunnissaannut piginnaatitsilissaaq, tamanna AG-mit allaaserineqarpoq.

Inatsisissatut siunnersuummi maannakkut tusarniaassutigineqartumi Naalakkersuisut siunissami ‘kommunini isumaginninnikkut maleruagassaat atorunnaarsissinnaavaat kommunit pisussaaffimminnik annertuumik illuartitsimappata’.

Siunnersuut taperserneqarpoq
Meeqqat Pisinnaatitaaffiinik Sullissiviup MIO-p siunnersuut taperserpaa.

Meeqqat illersuisuata Aviâja Egede Lynge tusagassiuutinut nalunaarummi ima allappoq:

- Meeqqanut inuusuttunullu tunngasunik nalunaarsukkat takutippaat amerlasuut atugarliortuusut, Namminersorluni Oqartussani MIO-miillu nalunaarusiat uppernarsarpaat kommunit ilaatigut suliassartik kivissinnaasanngikkaat meeqqanik ilaqutaannillu tapersersuiniarnerminni, nalunaarusiortoqarsimagaluarpalluunniit meeqqat inuunerinut ineriartornerinullu isumakuluuteqartumik imalimmik.

- Kiisalu meeraqarpoq kommunip aatsaat akuliuffigisagaanik inuunerat ineriartornerallu innarlereernerisa kingorna, kommunip ornigulluni misissuisannginnera pissutigalugu. Taamaammat MIO’p inatsisissatut siunnersuut tamaat tapersersorpaa.

Meeqqat qitiutinneqarnissaat
Meeqqat Illersuisuat politikkimut attuumassuteqanngitsutut Namminersortut kommunillu akornanni pissutsinut akulerunniarnanilu akulerussinnaanngilaq. Taamaattoq maluginiarpara oqallinnermi meeqqat illersorneqarnissaat siunnersuutillu tunuliaqutaa pineqanngitsoq.

- Meeqqat Illersuisuattut meeqqat atugaat ukkanneqannginnerat maqaasivara. Taamaammat ujartuivunga meeqqat pisinnaatitaaffitsik naapertorlugu ikiorneqanngitsut kommuninit qanoq iliorluni sullinneqarniarnerannik pisortatigoortumik nalunaartoqarnissaannik oqallittoqarnissaannillu. Meeqqat Illersuisuat Aviâja Egede Lynge oqarpoq.