Qaqortoq
Meeqqat persuttagaasarnerat Qaqortumi akiorniarpaat
Meeqqat oqaaseqartartuata Aaja Chemnitz Larsenip ataatsimik ukiullip Qaqortumi toqutaanera mamiatsaatigaa. Pisup alianartup naqissuserpaa meeqqat persuttaasarnermut suli illersorneqarnerungaartariaqartut
Qaqortumi nammineq piumassutsimik suliniartut meeqqanut nakuusertarneq pillugu oqallinnermik pilersitsiniarput. Kujataani illoqarfimmi tassani quarsaarsimaneqarpoq nukappiarannguup ataatsimik ukiullip toqutaanerata kingorna, tamannalu internetimi naapittarfinni oqallisaaqaaq.
Atuaruk: Ataatsimik ukiulik angumminit toqutaasoq
Nukappiarannguaq ataatsimik ukiulik pingasunngormat kingullermik toquvoq angumminit qiminneqarnermi kingorna.
- Assut pisimasumut attortippunga. Qaqortumi pisoq tassaavoq meeqqamut nakuuserneq sakkortunerpaaq. Ajoraluartumik meerarpassuit angerlarsimaffimminni inersimasunit nakuuserfigineqartarput, uffa taakkuninnga paaqqutarineqartussaagaluarlutik. Assorsuaq nikallornarpoq, uagullu inuiaqatigiittut tamanna piviusuusoq paasisariaqarparput unitsinniarlugulu, meeqqat oqaaseqartartuat Aaja Chemnitz Larsen oqarpoq.
Taanna isumaqarpoq pisimasup alianartup naqissuseraalusooq meeqqanut nakuusertarnerup eqqumaffigineqartuartariaqarnera. Taamaammat nuaannaajallaatiginerarpaa nammineq piumassutsimik suliniartut Qaqortumi saaffiginnissimammata meeqqanut nakuusertarnerup akiornissaa siunertaralugu oqallinnermik pilersitserusuttunit. Taannakku meeqqat inuunerissut MIOp Qaqortumi ambassadørianut innersuunneqarput, taakkulu meeqqat pisinnaatitaaffiannik sulissutiginnittoq Nanu Børn aamma suleqatigaat.
- Meeqqat pisinnaatitaaffii pillugit sullissivitsinni MIO-mi aamma NanuBørnit allallu NGO ´t suliniuteqarfiit nakuusernerup pinaveersaartinneqarnissaanut paasissutissiiniarnermik suleqatigiinnissamik isumaqatigiissuteqarfigisimavagut, tassanilu angerlarsimaffinni nakuusertarneq qitiussaaq, aammalu nakuuserfigitittaraanni imaluunniit nammineq nakuusertartuugaani sumi ikiortissarsiortoqarsinnaaneranik innersuussiviussaaq, Aaja Chemnitz Larsen oqarpoq.