nerisat

Meeqqat nerilluartarnissaannik ilinniartinneqassasut

Nerisat nerinerullu nalaani ileqqorissaarnissamik Sermersuumi meeqqat atuarfiisa ilinniartitsissutiginiaraat

Skolemad, Atuarfik Hans Lynge, Qinngorput
(Toqqorsivimmit)

Nerisassat peqqinnartut, qanoq nerriviliortoqassanersoq nerinermilul ileqqorissaarnissaq Kommuneqarfik Sermersuup atuarfiini atuartut ilinniartinneqartalissapput.

Atuarfinni atuareernerullu kingorna paaqqinnittarfinni meeqqat arfinilinniik 16-it tikillugit ukiullit nerisaat pillugit Kommuneqarfik Sermersooq politikkeqalersoq kommunip nittartagaani atuarneqarsinnaavoq.

- Meeqqat eqqiluisaarnermut, ataatsimoorluni nerinissamut meeqqat tamarmiullutik piareersaasarnissaannut, nerinerup nalaani iluasaarnissamut, sassaalliinermut atoriikkanillu piiaanermut ilinniartitsisut perorsaasullu takutitsilluartarnissaat pingaaruteqarluinnarpoq. Pingaaruteqarportaaq nerinerup piffissaqarfigilluarnissaa. Aamma pingaaruteqarluni meeqqat nererusussusiat eqqarsaatigalugit nerisoqartarnissaa nerinerullu toqqissisimanartumik ingerlanneqarnissaa pingaaruteqarlunissaaq. Tamakku tamaasa eqqarsaatigalugit kommunalbestyrelse sinnerlugu nuannaarutigaara nerisat peqqinnartut allanngorartullu taamatullu nerisitsisarnermi sinaakkutinik nerisat pillugit politikki innersuussimmat, Meeqqanut, Ilaqutariinnut Atuarfeqarnermullu ataatsimiititaliap siulittaasoq Poul Hansen (D) oqarpoq.

Atuaruk: Nereqatigiittarneq

Nerisassat ullormut pingaaruteqarnerit neriffiillu akornanni tamulugassat eqqarsaatigalugit nerisaqarneq pillugu politikki assigiinngitsunik innersuussuteqarpoq

Aalisakkat

Ullut tamaasa naatitartortitsisarnerit paarnartortitsisarnerillu, karrinik aserorterneqanngitsunik iffiukkat atorneqarnerunissaat, orsut akuugaanermikkut naammatsissimanngitsut atorneqartassapput sapaatip akunneranullu minnerpaamik ataasiarluni aalisagartortarnissaq pisassalluni.

- Meeqqat ullup ilarujussua atorlugu paaqqinnittarfinniittarput, taamaattumillu pingaaruteqarluinnarluni kommunip atuarfiini paaqqinnittarfiinilu inuussutissanik peqqinnartunik allanngorartunillu meeqqat nerisaqartinneqarnissaat. Ullup ingerlanerani meeqqap inuussutissanik peqqinnartunik nerisaqarnissaa angajoqqaanit, kommunimit aamma atuarfinnit akisussaaffigineqarpoq. Tassalu tamanna akisussaaffik toqqammavigalugu nerisaqarnermut politikki pilersinneqarluni, Poul Hansen (D) oqarpoq.

Ullormut nerisassat

Ullut tamaasa meeqqat nerisassaannik neqeroorfigineqartarnissaat nerisaqarnermut politikkit siunertaraa. Iffiat, pastat, qaqorteqqasut imaluunniit naatsiiat tamakkulu saniatigut naatitanik paarnanillu aamma nerisaqarnissaq nerisat pillugit politikkimi anguniagaallutik. Politikkimi aamma innersuussutigineqarluni pingaartinneqarpoq neqit, timmissat, aalisakkat orsoqarpianngitsut nerineqartarnissaat taakkununnga aamma ilaallutik manniit immussuillu orsoqarpianngitsut.

Atuaruk: Nuummi angerlarsimaffeqanngitsut nerisaqarnissaat tapiissuteqarnikkut qulakkeerneqarpoq

Atuarfinni atuareernerullu kingorna paaqqinnittarfinni (arfinilinniik 16-it ukiullit eqqarsaatigalugit) nerisat pillugit politikki pilersinneqartoq nerisat pillugit politikkip aappassaraa.

Timersortarfinni nerinermut maleruagassat suliarineqarput

Inuusuttuaqqat inersimasullu 17-it sinnerlugit ukiullit eqqarsaatigalugit taakku kommunip timersortarfiini naluttarfimmilu nerisaqartarneri pillugit politikkissaq maanna suliarineqaleruttorpoq.

Meeqqat atuarfiini paaqqinnittarfinnilu nerinermut politikki kommunip nittartagaani atuarneqarsinnaapput.

Powered by Labrador CMS