maajunnaq
Meeqqat mikisut qimmit quuisa anaasalu akornanni pinnguartartut
Nuummi perorsaasut pinnguartarfinni qimmit quuinik anaannillu qatsussilluinnarput
Nuussuarmi ulluunerani paaqqinnittarfiup Sikkersup ningiua, Karoline Egede, sulisut sinnerlugu Attartumi najugaqartunut allagaqarpoq qimmiutillillu kaammattorlugit qimmiutiminik anaannik, meeqqanut pinnguartarfinni pinnguartunut ajornartorsiutaaleraluttuinnartunik, katersisaqqullugit.
- Ulluunerani paaqqinnittarfitsinni qimmit pinnguartarfinni eqqaannilu sumulluunniit quilllutillu anartarnerat ajornartorsiutigilersimavarput. Mikisunik meeraateqarpugut paarmortunik sulilu pisulluarsinnaanngitsunik Attartumilu pinnguartarfimmi Sikkersup isaariaata akianiittumi uagullu nammineq pinnguartarfitsinni pinnguartartunik. Qaqugukkulluunniit qimmit quui anaalluunniit orluffigisinnaavaat, allaallu oqummiussinnaallugit, suunersut nalusaramikkik. Tamanna toqqissisimananngilluinnarpoq maajunnarluinnarlunilu, Karoline Egede oqarpoq.
Taassuma ulluunerani paaqqinnittarfimmi sulisut allat assigalugit qimmiutillit akisussaassuseqanngitsut qimmiminnik aneerussigaangamik anaannik qimatsiinnartartut qatsulluinnarpai. Meeqqat Sikkersumiittartut Attartumi pinnguartarfik, meeqqat aalasinnaanerannut iluaqutaasumik apussinertalik, ullut tamangajalluinnaasa atortarpaa.
- Meeqqanut silami silaannarissumi pinnguarneq peqqinnartuuvoq. Aamma apussinerit pinnguartarfinniittut meeqqat nukiinut iluaqutaapput meeqqallu suleqatigiinnissaannut ikioqatigiinnissaannullu meeqqallu ataatsimut misigisaqarnissaannutaamma iluaqutaallutik. Kisianni pinnguartarfinni qimmit anaat taama amerlatigisarmata meeqqat aniissanersut immitsinnut aperisalersimavugut, Karoline Egede oqarpoq, qimmiutillillu inoqatiminnut ataqqinninnissaannik akisussaaffimmillu tigusinissaannik kaammattorlugit.
Taanna isumaqarpoq, kommunip tungaaniit meeqqat mikisut eqqarsaatigineqalernissaat illersorneqalernissaallu piffissanngortoq.
- Qimmiutilinnut qimmit ulluunerani paaqqinnittarfinni tamakkualu eqqaanni kiisalu pinnguartarfinni allani quiartortinneqarnerat anariartortinneqartarnerallu inerteqqutigineqalersinnaavoq, taamaalioraangatalu kinguneqartitsisoqartalersinaalluni, Karoline Egede oqarpoq.
Qimmiutillit tigusisarnissamut pisussaaffearput
Kommuneqarfimmi uumasunut peqqissaasoq qimminillu nakkutilliisoq, Madeleine Lind, ilisimatitsivoq, qimmiutillit qimmimik qimataannik katersinissamut pisussaaffeqartut.
Kommunimi qimmeqarnermut qitsuuteqarnermullu ileqqoreqqusami atuuttumi, § 8 imm. 6-imi ima allassimasoqarpoq: ”Qimmimik qitsummilluunniit piginnittoq pisussaavoq qimmeq / qitsuk kikkunnilluunniit aqqutigineqarsinnaasumut anarsimappat piissallugu.” Taamaattumik piginnittoq qimmiutimi qitsuutimiluunniit qimataanik tigusinissamut pisussaaffeqarpoq. Qimmit sumi anarsinnaatitaanerannut piumasaqaateqartoqanngilaq, piginnittut tigusinissamut pisussaaffeqarmata.
Ileqqoreqqusanik malinninngikkaanni kinguneri suusinnaappat?
Kommunimi ileqqoreqqusanik atuuttunik unioqqutitsinerup kingunerasassai § 14-imi allaaserineqarput: ”Qimmiuteqarnermut qitsuuteqarnermullu ileqqoreqqusaq sutigut tamatigut unioqqutinneqarsimappat Nuup Kommuneata akuersissutaasimasoq utertissinnaavaa.” Tassa kommunimi ileqqoreqqusanik atuuttunik malinninngikkaanni kommunip piginnittoq qimmeqarnermut qitsuuteqarnermullu akuersissummik arsaarsinnaavaa, tamannalu piginnittup uumasuutimi angerlarsimaffissaanik nassaarniartariaqalerneranik kinguneqarsinnaavoq, tamannalu ajornarpat uumasuutimi toqutsinnissaa isumagisariaqalersinnaallugu.
Madeleine Lind ilisimatitsilluni aamma oqarpoq, uumasuuteqarnissamut akuersissutaateqartariaqarneq qimmiutilinnit qitsuutilinnillu amerlasuunit ilisimaneqartanngitsoq.
Inissiami nammineq pigisami attartortittakkamiluunniit najugaqaraluaraanniluunniit kommunimit qimmeqarnissamut qitsuuteqarnissamullu akuersissutaateqartariaqarneq ajoraluartumik tamanit ilisimaneqartanngilaq. Akuersissutaateqannginnerullu kingunerisinnaasai § 6, imm. 5-imi allaaserineqarput: ”Qimmimik qitsummilluuniit piginnittup uumasuutini nalunaarsortissimanngippagu kommunip uumasoq aatissinnaavaa toqutsillugulu piginnittumut taarsiinissaq eqqarsaatiginagu.”
Kommunimi qimmeqarnermut qitsuuteqarnermullu ileqqoreqqusat Kommuneqarfik Sermersuup nittartagaani atuarneqarsinnaapput, uani: http://sermersooq.gl/kl/innuttaasunut/uumasut/qimmit-qitsuillu/
Allaaserisaq Nuuk Ugeaviisimiippoq ataani akeqanngitsumik aaneqarsinnaasumi