Meeqqat ulluat
Meeqqat kommuninut eqqaassutissiissummik tunniussaqartut
Nakuusap Meeqqat Isummersorfiisa Meeqqat Ulluat atorlugu kommuniminnut meeqqat tamannguisa eqqaamasassagaat oqariartuuteqarniarput.
Qalipagaq uummataasaarartalik, uummataasaaraq ataaseq kommunimi meeqqamut ataatsimut takussutissanngorlugu.
Tassa Nakuusap Meeqqat Isummersorfiisa ullumi Meeqqat Ulluanut atatillugut kommuneqarfinnut tunniussassaat.
Qalipakkat meeqqat tamarmik eqqaamaneqarnissaannik kommuneqarfinnut eqqaasissutaapput. Ingammik meeqqanut eqqaamaneqarneq ajortunut.
- Meeqqat Ulluat pisarneq malillugu ulloritinneqartarpoq, tassani meeqqat ullorsiortittarlutigit, kisianni aamma ulloq taanna meeqqat ilaat ullorsiortinneqarpiartanngitsut isiginiarnissaannut periarfissaqarpugut – ullumi malunnartitsiffigineqanngitsut ullunilu allani, Ane-Mette Mougaard Nakuusami suleqataasoq, tusagassiuutinut nalunaarummi oqarpoq.
- Ajoraluartumik meerarpassuaqarpoq ullorsiorfinni eqqaamaneqanngitsoortartunik, taakkuli ullumikkut eqqaamassavagut.
Nakuusa Ilulissanii, Sisimiuni, Nuummi Qaqortumilu Meeqqanut Isummersorfeqarput. Qalipagaq Kommuneqarfik Sermersuumut tunniunneqartumi uummataasaaqqat 5.000-iupput.
Naakuusap aammattaa illoqarfiit nunaqarfiillu tamaasaa illoqarfigisaminni nunaqarfigisaminniluunniit meeqqanut eqqaassutissiissummik sananissaannik kaammattuisimavoq, uummataasaaqqanik qalipaaqqullugit, uummataasaaraq ataaseq meeqqamut ataatsimut takussutissanngorlugu.